AmaBhokobhoko avale umkhokha enqoba iScotland

14 Sep, 2023 - 00:09 0 Views
AmaBhokobhoko avale umkhokha enqoba iScotland amaBhokobhoko edibene leScotland

uMthunywa

AMABHOKOBHOKO awuqale kuhle umsebenzi wokuzama ukuvikela inkezo yomhlaba ngokunqoba iScotland nge 18-3 emdlalweni wawo wokuqala kuPool B eStade Velodrome, eMarseille.

Bekusemqoka ukuthi iqembu lakuleli liwunqobe lumdlalo ukuze lizibeke ethubeni lokudlulela phambili, liphinde liqede imbali embi yokuhlulwa emdlalweni wokuqala kumiqhudelwano emibili yenkezo le edluleyo.

Ngo-2015 kwatshwaqeka inengi labalandeli bethelwa phansi yi-Japan emdlalweni wokuvula. Ngo-2019 lagiqwa yiNew Zealand emdlalweni wokuqala wamaqoqo, kodwa acina ebuye layo inkezo.

Umdlalo lo ubungemuhle kakhulu ngenxa yamaphutha enziwe ngamaqembu womabili kodwa iqembu leSouth Africa likwazile ukuthola imklomelo emqoka esigabeni sesibili somdlalo.

AmaBhokobhoko awuqale ngomfutho umdlalo aphangisa athola umbekwa kwesokudla kodwa uMannie Libbok wayibeka eceleni.

Umdlali ogijima ku-flyhalf wenelise ukufaka kuhle imbekwa emibili alandeleyo wawabeka phakathi, amaBhokobhoko ahamba phambili nge 6-0.

Iqembu leli liphoqeleke ukuthi liphangise lenze utshintsho ngomzuzu wesi-26, lifaka uRG Snyman endaweni ka-Eben Etzebeth, okubonakale sengathi uthinteke ehlombe.

Ngomzuzu wesi-27 umdlali othenjiweyo eScotland, uFinn Russell, udlalise kabi uKurt-Lee Arendse kodwa unompempe wabona singekho isidingo sokumnika ikhasi, wacina ngokunika iqembu lakuleli umbekwa.

AmaBhokobhoko abengena engenile kungxenye yeScotland yenkundla kodwa ahluleke ukulisebenzisa ngendlela efaneleyo ibhola.

Lokho kuvumele iDark Blues ukuthi icine ithola umbekwa ovalelwe phakathi nguRussell, kwayiwa kukhefu kuyi 6-3.

ULibbok uphinde wakhuthaomunye umbekwa esigabeni sesibili kodwa kudlule imizuzwana amaBhokobhoko athola i-try yawo yokuqala ebekwe nguPieter-Steph Du Toit.

ULibbok bekumele engeze eminye imklomelo emibili kodwa i-conversion wayibeka eceleni, ezikaJacques Nienaber zahamba phambili nge 11-3.

Ulisulile icala lakhe lokukhutha uLibbok ngesikhathi ekhahlela ibhola elihle elithole u-Arendse engamakwangwa kwesokudla, watshayela iqembu lakuleli i-try yesibili. Kulokhu i-conversion itshaywe nguFaf de Klerk, kwaba yi 18-3.

Loba kunjalo, laye umehlule umbekwa olandeleyo, okutshiye abaqeqetshi bamaBhokobhoko benwaya amakhanda, kusobala ukuthi abakamtholi umdlali onjengoHandre Pollard, osale ekhaya ngenxa yokuthi ubengakasili ngokupheleleyo ngesikhathi kumenyezelwa iqembu elizaya eFrance.

IScotland izamile ukuzibuyisela emdlalweni kodwa yehluleka ukudlula odongeni lwamaBhokobhoko, umdlalo wacina uphele nge 18-.
AmaBhokobhoko azadlala olandelayo leRomania ngeSonto ngehola lesithathu ntambama.

Share This:

Sponsored Links

Survey


We value your opinion! Take a moment to complete our survey

This will close in 20 seconds