YiNtatheli kaMthunywa
ISIPHITHIPHITHI esisemigwaqweni yakoBulawayo esibangelwa yikuma kwamabhasi aya kwamanye amazwe endaweni ezingekho emthethweni, sokuzakwedlula nanko iNational Railways of Zimbabwe kunye leKhansili yakoBulawayo sebevumelane ukuba kube lendawo lapho okuzakuma amabhasi la, koLoliwe.
I-NRZ kunye leKhansili yakoBulawayo sebevumelane ukuba kuguqulwe enye indawo yeMain Station ibe yindawo lapho okuzamela khona amabhasi aya eBotswana kunye leGoli.
Inyathelo leli lijonge ukuthi kuqedwe isiphithiphithi esibangelwa yikwehlisa lokuthwala kwamabhasi la endaweni ezingekho emthethweni okucina kubiza labathengisayo kizo.
Imigwaqo eminengi edolobheni isiphendulwe yaba yindawo lapho okuthwalwa kubuye kwehliselwe khona abantu ngamabhasi la. Lokhu sokubangele ukuthi ingxenye zedolobho zibe zindawo lapho okwenziwa khona okungekho emthetheni.
Ikhona likaHerbert Chitepo Street kunye loFifth Avenue selisaziwa ngokuminyana kwezimota okubangelwa ngamabhasi ayehlisa abuye athwale abaya labavela eBotswana. Ngokufanayo, amabhasi asuka koBulawayo esiya eJohannesburg athwala abuye ehlise emgwaqweni uTongogara Street phakathi kukaFifth lo Sixth Avenue, kuthi amanye apaka ekhoneni lika Fifth Street lo Leopold Takawira, maqondana leBulawayo Central Police station.
UMphathi wezobudlelwano lomphakathi kunkampani yakoLoliwe, uMnumzana Andrew Kunambura uqinisekise ngesivumelwano seNRZ kunye lekhansili yakoBulawayo.
“Akulahlelo lokutshintsha ibe yindawo yokumela imitshova kodwa izakuba yirenki yamabhasi achapha imigcele,” kutsho uMnu Kunambura.
Isikhulumi seKhansili yakoBulawayo uNkosikazi Nesisa Mpofu katholakalanga ukuthi achasise ngalokhu.
Esinye isikhulu sekhansili siveze ukuthi ikhansili yakhetha iNRZ Station ngoba kulapho okutholakala khona indawo zokuzincedisa ezifana lezambuzi, okulamanzi kunye lezakhiwo ezingasetshenziswa njengendawo yokulinda ngabantu abaya kwamanye amazwe.
