uMthunywa
IZINQUMO zokuthola iviza zicine ziphose zavalela phandle abalandeli bebhola ababili uAlvin Zhakata weZimbabwe loBotha Msila oweSouth Africa abahambe “ngenyawo” ukuyabukela i-Africa Cup of Nations (Afcon).
Bobabili baqale loluhambo ngeSonto eledluleyo bethembe ukucela ukugada izimota zabanikazi baze bayofika eCairo, e-Egypt.
Endleleni badibane lenkinga bedlula ezweni leTanzania lapho abafike balala khona esititshini sebhasi bedliwa ngamakhaza. Inkinga enkulu bayifice emngceleni ohlukanisa iKenya le-Ethiopia.
Kusukela ngoLwesine olwedluleyo bebelwela ukuyangena e-Ethiopia kodwa zala ukuvula iziphathamandla kuthiwa abakhiphe ama-viza.
NgeSonto bakhiphe umbiko ekhasini leTwitter besithi bekungcono bephenduke.
“Sengitholile ukuthi kuzoba nzima impela ukuthi siqamule umngcele. Ngakho sengikhethe ukuthi ngingaqinisi ikhanda ekuhambeni. Ngibona kungcono ukuthi ngibuyele ezweni lami ngiyolandela. Ngiphatheke kabi ngokuthi kufuneka amaviza,” kutsho uMsila.
— Ubulembu
