Brandon Moyo
NGEMVA kokunqoba kwabo kumqhudelwano we 2024 Rugby Africa Cup, iqembu lombhoxo leZimbabwe, ama-Sables anyukele phezulu ngendawo ezimbili kumazinga omhlaba ngokutsho kwe World Rugby.
I-Zimbabwe yedlule iBlegium le Brazil ukuya endaweni yamatshumi amabili lasitshiya galombili emhlabeni jikelele. Ngesikhathi besiyaqala ukudlala ku Africa Cup, babehlezi kunombolo yamatshumi amathathu. Ama-Sables sebelemiklomelo engu 56,03 ngemva kokuzuza angu 2,51 ku Africa Cup.
Lesi sekuyisikhundla esiphezulu kuma Sables kusukela ngo 2015 lapho abafika khona kunamba 26.
Emazweni e-Africa, iZimbabwe liqembu lesithathu ngemva kweSouth Africa le Namibia. AmaBhokobhoko ahlezi phezulu kuthi amaWelwitschias akuzinga elilodwa besiya ku 25.
Iqembu le Zimbabwe lanqoba ele Algeria 29-3 emdlalweni wamanqamu ngeSonto ukuze bathole indebe ye-Africa. Endleleni yokuba liqembu eliphezulu e-Africa (ngemva kwamabhokobhoko), ama Sables aqala ngokunqoba i-Uganda 22-20 kuma-quarter final ngaphambi kokuthi aqede utshiki lobhanqa weminyaka engu-23. INamibia bayinqoba 32-10 kuma semi-finals.
Ngemva kokunqoba kwabo e Africa, amaSables aselungiselela ukudlala kuma qualifiers bekhangelele ukuya kundebe yomhlaba ngo 2027 e-Australia. Ngomnyaka ozayo, bazadlala le Namibia, Kenya le Uganda lapho iqembu elizanqoba lizaqhubekela phambili ngokuya e-Australia.
Kowamanqamu bedlala le Algeira ngeSonto, amaSables enza umsebenzi oncomekayo. Umdlali ohambe phambili weZimbabwe ngowemuva oleminyaka engu-21, uTrevor Gurwe, obedlala okokuqala eqenjini leZimbabwe.
Kumzamo try yokuqala, umdlali wasemuva uTakudzwa Musingwini wehlisele uGurwe, ophumelele ukunqoba i-try, kodwa esikhundleni sokubeka nje ibhola, uGurwe wakhetha ukudukisa abadlali ababili basemuva be-Algeria.
Ukaputeni wamaSables uHilton Mudariki obedlala ku scrumhalf laye wenza umsebenzi omuhle kumdlalo we-Algeria. IZimbabwe yahamba ekhefini ihlezi phambili inqoba 12-3. UJulien Serge Caminati wohlohla umbekwa eqenjini le Algeria.
Kodwa uCaminati oleminyaka engu-38 ongomunye wabadlali abathenjiweyo e-Algeria wakhutha imbekwa emine. Umqeqetshi wamaSables uPiet Benade uphiwe umklomelo wokuba ngumqeqeshi omkhulu ku Africa Cup, kuthi uTapiwa Mafura kuthiwe nguye umdlali oncinte abanye bonke kulomqhudelwano.
AmaSables baphindele kuleli ngoMvulo ntambama lapho abamukelwe khona njengamaqhawe eRobert Mugabe International Airport eHarare.
