Ama-avocado angalethela umlimi imali yakwamanye amazwe

16 Jan, 2020 - 00:01 0 Views
Ama-avocado angalethela umlimi imali yakwamanye amazwe

uMthunywa

Wayne Ncube

INKAMPANI ethengisa inhlanyelo lempahla yokulima i-Farm and City Centre ikhuthaza abalimi ukulima izihlahla zama-avocado ngoba zilomkambo omkhulu kanye lenzuzo kumpilakahle yabantu.

Intatheli kaMthunywa ikhulumisane loMnumzana Raphael Ncube oyingcitshi kweze-horticulture kunhlanganiso le, othe ama-avocado alimeka lula ngoba kadingi msebenzi omkhulu ukuwakhulisa, izihlahla zakhona zivuma kuloba yiphi indawo ukulinywa.

Uthe odokotela labo sebekhuthaza uzulu ukuthi adle ama-avocado ngoba elenzuzo kumpilakahle okwenza umkambo wawo ubemkhulu.

Ama-avocado yizithelo ezingalimeka kumumo wemikhathi etshiyeneyo ngakho kuyinto enhle ngoba ayalimeka emkhathini esiphila kuwo eZimbabwe. Isithelo lesi sidinga ukulinywa endaweni elesikhudumezi esiphakathi kwe-17°C kusiya ku-27°C ukuze sikhule kuhle.

“Ukuze umlimi athole isithelo esihle kumele ananzelele umhlabathi lapho awalima khona ama-avocado akhe, umhlabathi  obomvu yiwo ovuma kakhulu isithelo lesi njalo ubengumhlabathi ongavimbi ukuhamba kwamanzi ovundileyo, nxa ungavundanga umlimi angasebenzisa ifethalayiza ukungezelela ukuvunda komhlabathi,” kuchaza uMnu Ncube.

Uqhubekele phambili uMnu Ncube ngokuthi abalimi kumele bavikele izihlahla zabo ngokuzivikela emoyeni.

“Abalimi kumele nxa behlanyela izihlahla zabo bakhangele ukuthi indawo yabo ayila moya omnengi ngoba umoya ungadala umonakalo ezihlahleni zezithelo okungabangela ukuwa kwengatsha umlimi alahlekelwe yinzuzo,” kuchaza uMnu Ncube. 

Ugcizelele ngokuthi isithelo lesi asidingi mali enengi ekusinakekeleni.

“Isithelo lesi asidli kakhulu esikhwameni somlimi ngoba singahlaselwa kakhulu yimikhuhlane ngakho ukusilondoloza kwaso akudingi mali enengi. Umsebenzi omnengi ukhona ngemva kweminyaka lapho okuyabe kuhlanyelwa izihlahla ezintsha ngoba zilakho ukukhula zize zibe yi60 feet,” kuchaza uMnu Ncube.

Abalimi balakho ukuthola inzuzo engaphezulu ngokuthengisa izithelo zabo ngoba zilomkambo omkhulu phakathi langaphandle kwelizwe.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds