uMthunywa
Nkosilathi Sibanda
Phose kuzo zonke imuli ezihlala elokitshini leLobengula koBulawayo kukholelwa ukuba kukhona umdlali webhola likanobhutshuzwayo.
Kubikwa abadlali benguqu babuzana amavuko nsukuzonke kulindawo.
Lo ngumbono wabalandeli bomdlalo edolobheni kulandela ukunanzelela kwabo ukuthi banengi abadlali abaphuma kuleli lokitshi elidala. Kubadlali laba, bakhona abancinyane abasacathula abadinga usizo ukuze bakhuthale emdlalweni.
Izinga lethalenta lomdlalo kwabasakhulayo abahlala elokitshini leLobengula selifuqe omunye usaziwayo koBulawayo ukuthi aqoqe umqhudelwano ozadibanisa amaqembu ayisitshiya galombili.
Usaziwayo lo nguTumediso Mokoena Ndlovu, odume ngelithi “Drogba” kunguqu.
UDrogba lo waba lodumo engumkhokheli weNew West City eyaphakamisa abadlali abaziwayo kuPremier Soccer League ababalisa uRahman Kutsanzira, Tendai Ngulube, Warren Dube, Zibusiso Sibanda, Erico Phiri, uBlessing Mwandimutsira labanye abadla ubhedu basuka baya phetsheya.
Kuthe uDrogba esebone ukuba kukhona okusilelayo ekuphakamiseni abadlali abasakhulayo, ukubone kufanele ukuthi axhase umqhudelwano lo ozaqhutshwa kusukela mhlaka 10 kusiya fika mhlaka 11 Mpalakazi.
Drogba tournament
Utshele uMthunywa ukuthi inhloso yalokhu yikuvuthisa abadlali abasakhulayo abaziwa ngokuthi ngama-2K, lokubanikeza ithuba lokuthi bazibonakalise.
UDrogba, owakhulela eLobengula uthe uzadibanisa iLobengula Rovers, Vitality, Njube Spurs, LMC, Lobengula Stars, Highflyers, Njube United le-Emakhandeni Pirates.
Amaqembu la kuhlelwe ukuthi adlalele enkundleni ezimbili elokitshini leLobengula.
Ukuze aqhelise usekelo lwakhe, uDrogba labanye abaqoqi bomqhudelwano bakhethe ukuthi banxuse amaqembu amabili abesifazane iLobengula City Queens leFMSA.
Ekhuluma lephephandaba likazulu, uDrogba uthe uxhasa abasakhulayo ngoba yibo insika yokuphumelela kwenguqu.
“Ikusasa lomdlalo wenguqu yakithi liphethwe ngabantwabethu. Nampa abadlali banengi kodwa badinga usekelo lwethu. Ngithe ngisukumele phezulu njengomuntu wenguqu ngibaxhase,” kubika uDrogba.
“Silamaqembu ambalwa elokitshini leLobengula, okulapho engifuna ukuthi ngincedise kakhulu abadlali abasakhulayo. Kuyadabukisa ukuthola ukuba bakhona abadlali abaswela impahla ebancedisa ukuthi badlale.
Akhona njalo amaqembu angela lona ibhola lokusebenzisa nxa elolonga. Lokhu kuzwisa ubuhlungu ngenxa yokuba akula umdlalo ongenelisa ukuthi ukhule usilela impahla enjenga le.”
Drogba tournament
Omunye wabaqoqi bomncintiswano uBongani Mafu ukhuthaze amaqembu anxusiweyo ukuthi asebenzise ithuba aliphiweyo.
UMafu, ophinda abengumqeqetshi ohlonitshwayo, uthe kungumlandu wabomaneja labokaputeni ukuthi bacebise amaqembu ngokubaluleka komqhudelwano lo.
“Imidlalo le inikeza ithuba lokuzibonakalisa kulabo abafuna ukuya khatshana ngomdlalo wenguqu.
Abadlali bethu abasakhulayo abacetshiswe, baboniswe ukuthi inguqu ingumsebenzi njalo iyaphilisa.
Kubikwa wonke amaqembu azathola impahla yokulolonga ebalisa ama-con, izikipa, amabhola lokunye.
“Akula iqembu elizaphuma lingela lutho,” kutsho uDrogba.
Amaqembu azafinyelela izigaba zama semi-final azayengeza impahla le kuthi abadlali abenze kuhle baphiwe izicoco. Intshantshu izabuyela ithwele inkezo.
“Okwenza amaqembu engaphumeleli yikuswela impahla eyiyo eyokulolonga, yikho sikhethe ukuthi siphathise ngempahla le.
