uMthunywa
Ethel Ncube
INHLANGANISO yeAgitex ikhuthaza abalimi ukuba baqale ukulima amacucumber ngoba alenzunzo njalo abalimi abanengi kukhanya abawalimi.
UMnumzana Philani Dube ongumlimisi eMatebeleland North sekhuthaze abalimi ukuba isikhathi sokuhlanyela icucumber sesifikile.
Ekhuluma lentatheli umlimisi uPhilani Dube uveze ukuba abalimi abaqale khathesi ukuhlanyela isilimo lesi.
Imali
“Abantu abanengi bayesaba ukulima icucumber ngoba ithatha isikhathi ukuvuthwa kodwa nxa isivuthiwe yimali enhle kakhulu. Ukuvuthwa kwayo ithatha amalanga angu-55 kusiya ku-70. Isilimo esisodwa silakho ukuzala abantwana abalitshumi. Nxa uhlanyela kumele izilimo zakho zivulelane izikhala ezifika ku-45cm kusiya ku-60cm kuthi imizila yakho ivulelane nge120cm kusiya ku150cm.
‘’Nxa usuhlanyelile ulakho ukuthi uthelele kanye ngeviki ngoba isilimo lesi akumelanga kubemanzi kakhulu lapho esihlanyelwe khona kungabamanzi kulakho ukuthi ama-cucumber akho angaphumi ngendlela eqondileyo,” kubika uMnu Dube
Uqhubekele phambili eveza ukuba ku acre eyodwa ulakho ukuzitholela imali yakho enhle
“Ku acre ulakho ukuthola amacucumbers akho angu-259 kusiya ku-300 nxa ethengiswe kuhle ulakho ukuthola imali efika $800 kusiya ku $1000US. Umkambo ukhona kumawotela, ezitolo, ezindaweni abapheka khona ukudla labawosayo awusweli imakethe kungakho abalimi abenelisayo abawalime,” kuphetha uMnu Dube.
