Yintatheli kaMthunywa
UMPHATHINTAMBO wogatsha lwezemidlalo kuHulumende uKirsty Coventry, ongomunye abakukhetho lokuba ngumsekeli kamongameli we-International Olympic Committee, usesekele umthetho ovimba abobubili obungacaciyo ukuthi baphatheke kwezemidlalo.
UCoventry, ohlonitshwa kakhulu ngokuba yintshantshu yama-Olympics, aphinde abelilunga lebhodi ye-IOC, utshele iphephandaba le-The Telegraph ukuthi usekela umthetho lo ukuze kube lamalungelo alinganayo emincintiswanweni.
“Ukuvikela abesifazane kunye lemidlalo yabesifazane kubaluleke kakhulu,” kutsho uCoventry.
Uqhubeke wathi: “Luyanda ucwaningo lwesayensi ngaloludaba. Angeke sibe lengxoxo yokuthi ilimaza njani ezemidlalo kwabesilisa. Lokho, kukodwa, kutsho ukuthi sidinga ukuvikela imidlalo yabesifazane.”
UCoventry, owathola imendulo eziyisikhombisa zama-Olympic kwezokubhukutsha, okuhlanganisa ezimbili ezegolide, uphinde wathi: “Kusobala ukuthi abesifazane abatshintsha ubulili bayenelisa kakhulu kumidlalo yabesifazane njalo bancindezela abanye amathuba okuphumelela.”
UCoventry uzibonele mathupha inkinga ezingavela ngokuvumela abesilisa ukuthi bancintisane labesifazane, ikakhulukazi kwezemidlalo ngokuthintana kakhulu ngokomzimba.
UCoventry usize kakhulu ekuqhutshweni kwama-Olympics eParis, lapho abadlali be-boxing u-Lin Yu-ting lo-Imane Khelif abathola khona imendulo yegolide, loba nje ngaphambilini kwakubikwe ukuba kabavunyelwa ukutshaya isibhakela labesifazane yi-International Boxing Association.
“Izifundo zizahlala zikhona ngaso sonke isikhathi. Imincintiswano yeParis ingesinye salezo zikhathi.”
Ama-Olympics alandelayo azaqhutshelwa eLos Angeles, eMelika ngo-2028 njalo uMongameli uDonald Trump, laye okhankasela ukuthi abesilisa bengancintisani labesifazane, uzabe elokhe ebusa. — Ebulenjini
