Akuqili lazikhotha emhlane. . . ‘Yekelani ukwehlisa iminyaka yabantwana’

23 May, 2024 - 00:05 0 Views
Akuqili lazikhotha emhlane. . . ‘Yekelani ukwehlisa iminyaka yabantwana’ football...

uMthunywa

Nkosilathi Sibanda

NJENGOBA imidlalo yethemu yesibili isiqalisile ezikolo, sekuphume isixwayiso sokuthi labo abazatholakala beqila ngeminyaka yokuzalwa kwabantwana bazajeziswa.

Lokhu kuza ngemva kokunanzelela ukuthi ababalisi labaqeqetshi bamaqembu ezikolo sebelomkhuba wokwehlisa iminyaka yabadlali, behlose ukuthi banqobe emincintiswaneni. Inhlanganiso eziphatha imidlalo ezikolo, iNational Association of Secondary School Heads (Nash) leyeNational Association of Primary School Heads (Naph) sezibambene ekuthini zilwisane lomkhuba lo osungcolise imidlalo yabantwana besikolo. 

Umkhuba omubi lo kubikwa wenziwa kakhulu emdlalweni wenguqu loba nje ukhona futhi kumidlalo ebalisela ukuqaga, volleyball, handball lethenisi.

Inhlanganiso zeNash leNaph zethule umbiko wokwazisa ababalisi ukuthi bazajeziswa okuzwayo bengaqila ngeminyaka yabantwana.

Ezikolo zemfundo yaphansi, ukujeziswa kwababalisi lezikolo kwaqala ngomnyaka odluleyo lapho okwavunyelwana khona ukuthi labo abazabanjwa beqila, bazabhadaliswa iUS$300.

Umphathisikolo obona ngezomdlalo wenguqu kunhlanganiso yeNash esabelweni seMatabeleland North uKhumbulani Sibanda uthe bazaqhubeka ngokubeka imithetho enqabela ukuqila emdlalweni.

“Ukuqila ngeminyaka yabantwana kuphambanisa zonke inhlelo njalo kubulala ikusasa yomntwana. Sizaqina ngokukhuthaza izikolo ukuthi zingalingi zenze into engayisiyo. Kumele siphakamise ithalenta labantwabethu,” kutsho uSibanda.

Kuluhlu lwemidlalo olukhitshwe yinhlanganiso le, kuqonqoselwe ukuthi bonke abadlali kumele batshengise impumela yemihloliso ka-Grade Seven, incwadi yokuzalwa, isithupha kulabo abaleminyaka yokuzalwa engu-16 kusiyaphezulu, lesithupha sesikolo esidindwe ngemva komhlaka 31 Nkwenkwezi. 

Imincintiswano yenguqu kuzikolo zemfundo yaphezulu eMatabeleland North iqalisa ngoLwesihlanu lapho okuzadibana amaqembu ama-Under 20 eziqintini.

U-Arthur Maphosa umgcinisihlalo weNash uthe: “Isixwayiso sethu ngesokuthi sincintise ngendlela efaneleyo hatshi ukuqila. Akube ngumlandu wethu sonke njengababalisi, abaqeqetshi labazali ukuthi silandele imithetho lokuthi sibeyingxenye yokulolonga ithalenta labantwana abazathi kwelakusasa bamele ilizwe kumincintiswano ephezulu.

“Kumincintiswano uyezwa abantwana besinye isikolo bekhala ngokuthi umdlali okuqembu lesikolo esithile kade waqeda ukufunda. Njengababalisi kumele sitshiyane lemikhuba enje ngoba ibisela impumelelo emuva.”

 

Share This:

Sponsored Links

Survey


We value your opinion! Take a moment to complete our survey

This will close in 20 seconds