uMthunywa
YiNtatheli kaMthunywa
NGOMGQIBELO mhlaka 28 Lwezi kuyabe kungabizwa ozwayo koNtuthu kumkhosi omkhulu ka2020 wokunika labo abenze kuhle inkezo lemvuzo yokwenza kuhle kundima yokuzithokozisa kumaRoil Bulawayo Arts Awards (RBAA).
Umcimbi walonyaka (#RoilBAA20) usuhuge abanengi njalo wenziwa ngesikhathi ilizwe lilokhu libhekane lobhubhane lweCovid-19 oluhlasele umhlaba wonke jikelele.
Umbuthano lo olobucwazicwazi obekumele wenziwe ngenyanga kaNcwabakazi, uzaqhutshwa ngempelaviki njalo kuzabe kuhlonitshwa labo abenze kuhle ukwedlula abanye esabelweni sakoBulawayo, Matabeleland North kanye leMatabeleland South.
Umcimbi lo osuleminyaka emine usenziwa uphanjaniswe lubhubhane lweCovid-19 olwenze kwabekwa umthetho wokuhlala emakhaya okwenyanga ezinhlanu ezedluleyo. Kusenjalo labo abasekela umcimbi lo sebethembise ukuphathisa labo abake bathola izicoco.
Kumcimbi lo kukhangelelwe ukuthi kukhethwe intshantshu yakoBulawayo kumculo weTshibilika/Rhumba phakathi kukaClement Magwaza, Godolude, Madlela Sikhobokhobo kanye loThemba Boyoyo.
Cal Vin
Kundima yeMbube kuzadonselwana isicoco phakathi kweqembu le-Indosakusa The Morning Star, Family Voices, Nobuntu kunye leSunduza.
Kundima yeHip Hop kukhangelelwe ukuthi ingcitshi ikhethwe phakathi kwabahlabeleli abathi uAsaph, umuyi uCalvin, Fish F. Ndaramu, Msizkay loPreyung.
Esinye njalo isicoco esizabe sikhangelwe ngamehlo abomvu ngesalowo osanda kungena kundima yokuzithokozisa othethe abantu ngodumo ozakhethwa phakathi kuka-Helen Nyathi,
La Dee, Mandie Mae, Preyung kanye leSikhosana Band.
