uMthunywa
Nkosilathi Sibanda
AMEHLO athe nhlo kumgcinisihlalo weHighlanders uJohnfat Sibanda nanko phela sekuvela ukuthi inkokheli zeqembu zithwele nzima ukuthi zithole omunye umqeqetshi.
IHighlanders ixotshe uMandla “Lulu” Mpofu ngoMvulo ngeviki edluleyo ingelalo elinye icebo eliseduzane lokudinga ongangena esihlalweni.
uMandla “Lulu” Mpofu
Iqula le-executive, elikhokhelwa nguSibanda lokhe lingakawuvuli umlomo ngaloludaba.
Okwamanje kuqeqetsha uJoel Luphahla ozakhuza iqembu kulimpelaviki enkundleni yeNyamhunga kumdlalo weCastle Lager le-ZPC Kariba.
Umqeqetshi lo, kubikwa usabambile nje okwesikhatshana kulindwe ukuqhatshwa komunye umqeqetshi.
Ngenxa yokuthula kukaSibanda lequla lakhe, amalunga eHighlanders aselalela amahungahunga asegcwele mayelana ngomqeqetshi omutsha.
Kulabalandeli abathi ukuxotshwa kukaMpofu kwakungamelanga kwenzakale nxa kungela umuntu ozangenela indawo yakhe ngokuphangisa.
Okukhwezela umbono lo kubalandeli yikuthi inkokheli zeqembu zakhetha ukubika ngokuxotshwa kukaMpofu ngemva kwamalanga amathathu.
“Kutsho ukuthi akulamuntu abangamqhatsha phela.
Kungani baxotsha uMandla besenza angathi ukhona umqeqetshi asebekhulume laye?
“Abakhulume abadala ukuthi bakusiphi isibanga ukuze lathi sikwazi ukubekezela.
Kumidlalo elandelayo uJoel angeke azimisele ukwenza kuhle esazi ukuthi ugcinele omunye umsebenzi,” kutsho uChristopher Nyandeni umlandeni olilunga elipheleleyo kuBosso.
Umsekeli waleliqembu olodumo uDuduzo “Teekay” Ncube uthe abahlalisekanga.
“Okubalulekileyo yikuthi iqembu lithole imiklomelo yonke emdlalweni.
Sifuna ukunqoba ngakho kudinga ukuthi kubelomqeqetshi ngokuphangisa.
Sihlalele evalweni lokuthi singanqotshwa sithembile.
Abaqhatshe umqeqetshi abadala, bengadlalisi isikhathi ngoba imidlalo ayilindeli muntu,” nguNcube lo.
Amahemuhemu asesabalala ebulenjini bokuxhumana lakungxoxo ezithile, achaza ukuthi owake waba ngumqeqetshi weqembu uPieter De Jongh useveze isifiso sokubuyela eqenjini.
Umqeqetshi lo ubelolonga ilizwe leSomalia.
Ukungaphumeli egcekeni kwe-executive yeHighlanders ngenyathelo lokuqhatsha umqeqetshi kwenze u-De Jongh waphumela sobala ngesifiso sakhe.
Uqale indaba yakhe ekhasini lika-Twitter lapho abike ukuba usetshiyane leqembu leSomalia futhi usekhangelele ukuthi ayelolonga elinye iqembu kuzwekazi le-Africa.
Ufake isimemezelo lesi egqoke isikipa seBosso.
Abalandeli beHighlanders basukumele phezulu ngembuzo, lakanye kazange atshaye inja efihla umphini u-De Jongh.
De Jongh
“Ngikhona,” yiyo impendulo yalumqeqetshi kubalandeli beHighlanders.
Umqeqetshi lo wasuka enikeze iHighlanders inkezo yeChibuku Super ngesizini ka-2019.
Kuliviki kuzwakale ukuba iBosso yehluleke ukuvumelana lengcitshi yomqeqetshi uGavin Hunt owake wenza udumo ngokuqeqetsha amaqembu amakhulu eSouth Africa abalisa eleKaizer Chiefs.
Abanye okubikwa belunguzile ngu-Amin Soma Phiri, Mohamed Fathi, Philani Ncube, loMark Harrison.
Phakathi kwabo bonke, kubikwa inkokheli zeHighlanders zizadanela kuJavier Martinez Espiona ovela eMexico.
Umqeqetshi lo, ngokuzwa kwentatheli kaMthunywa, uthumele iCV ejabulise i-executive kaSibanda ngoLwesibili.
Iphephandaba likazulu lizame laze lahawula ukuthola izwi likamgcinisihlalo uSibanda loRonald Moyo, ngoba abazange baludobhe ucingo ngesikhathi kudingisiswa ukuthi bahlose ukuqhatsha bani.
