uMthunywa
KUMAVIKI ambalwa ngangivakatshele kwelinye ilizwe elingumakhelwane, nqwa nqwa lamadoda eqabuzana betshengisa ukuphuphuma kothando okomfana lenkazana esanda kuphuhla ngoba isikhulelwa yimizwa engazi lokuthi angayithiba kanjani.
OwayenguMongameli welizwe uMnunzana Robert Mugabe wayevamile ukukhuluma etshengisa inzondo kulabo abathandana bengobobulili bunye. Wayedumile ngenkulumo yakhe ethi: “they are worse than pigs” ngitsho lembongolo wayethi ziyazi ukuthi enduna yiphi njalo ensikazi yiphi.
Into eyasuka yangidida yikuthi labo nxa bekhombisana benza njengakhonokho esikujwayeleyo okwesilisa lowesifazana. Phela siyasizwe amanye amadoda nxa ekhombisa besebenzisa ulimi olumnandi uzwe bethi nxa ngikubona ngizwa kuqaqamba amathambo agodole inhliziyo.
Kambe lamadoda ayatshelana izinto ezifanana lalezi, kumbe abanye labo ngababhalelana izincwadi njengesasikwenza kudala untombazana aphendule athi usacabanga, ngoba esekhulelwa yimizwa.
Khona nxa sokumele utshengise obabakazi isithandwa sakho, uthole amadoda eqhubana esiya kobabakazi yimihlolo bani batayi, inkomo ingazalumuntu koMhlahlandlela.
Kowakithi umdeni ngeke sivume leyo ndidane yendaba. Yebo ye lilungelo labo kodwa esikweni labantu abansundu akwejwayelekanga. Ngikholwa labokhokho bethu phansi batshibilika bangaqedi nxa bebona indlela abantu balamuhla asebeziphatha ngayo asebeze besendlulwa lazinyamazana ezingacabangiyo.
Sikhula sasikuzwela kubo ndlebe zikhanyilanga ngoba bona bethanda ukwenza imihlolo mihla ngemihla. Nxa wake wakhombisa enye indoda sitshele wakwenza kanjani hayi okunengi kasifisi lokuba kwazi ngoba kuyesabeka, kudida ingqondo mpela.
