Ajabulile amabhoni

29 Sep, 2022 - 00:09 0 Views
Ajabulile amabhoni Abadlali beqembu leHwange

uMthunywa

Nkosilathi Sibanda
LISIYA kunina ngoMgqibelo, abalandeli benguqu edolobheni bazabe sebehlabela, kujatshulelwa ukuphenduka kweHwange FC kunkundla zePremier Soccer League.

Kukhangelelwe ukuthi kugcwale phamu eColliery Stadium iHwange ibhekane leqembu leNdlovu Iyanyathela, kumdlalo weligi ka-Division One kumhlubulo ongezansi yelizwe, lapho abasekeli beHwange asebebike ukuba akungathandabuzwa ukuthi izanqotshwa liqembu labo.

Kube lula ukuthi iHwange isondelele kuPSL nanko ngempelaviki edluleyo iphiwe imiklomelo yamahala ngemva kokuba iqembu le-Ajax Hotspurs lehluleke ukuyadlala. IHwange iphiwe lumdlalo nge 3-0.

IChipangano idinga nje umklomelo owodwa emidlalweni emibili elandelayo eseleyo ukuze kuqiniseke ukuthi isisukile ezikwakweni. Umdlalo leNdlovu Iyanyathela, ngokutsho kwabasekeli beHwange, uzatshisa.

Izimbamgodi zamalahle lezi kubikwa zilolonga zingaqedi zizama ukuthi ziqinele umdlalo lo.
Abanye abasekeli abakhulume lentatheli kaMthunywa ngoLwesibili bathe baqalisa ukujabula kumaviki amabili adluleyo ngoba sebebonile ukuthi iqembu labo seliyintshantshu eColliery kulimpelaviki.

Iqembu elalisethusela ukuthi lingaqethula iHwange esiqongweni ngele-ZPC Hwange, kodwa kuthe umdlalo wazo uphethe kungutshiki lobhanqa ka 1-1, kwakhanya kubalandeli ukuthi iChipangano isiyintshantshu.

“Sizanqoba. Kusegcekeni ukuthi angeke sivume ukuthi Indlovu Iyanyathela isuke koBulawayo ilande ukuzonqoba,” kutsho uNickson Nyoni ohlala elokitshini leMadumabisa eHwange.

UJohn Ncube osesekele iHwange okweminyaka eyedlula amatshumi amabili, uthe okubathabisa kakhulu yikuthi labo njengezakhamizi zeHwange sebethola futhi ithuba lokubukela inguqu yePSL.

“Kunini sacina ukubona iHighlanders kumbe iDynamos la? Ngesizini ezayo siyabe sidlala lazo. Kumnandi sibili. Sengilandele iHwange okweminyaka eminengi.

Ngadana ngomnyaka siphuma kuPSL, kwaba buhlungu njalo ukuhlala enye isizini siphandle ngenxa yeCovid-19.” Iqembu leHwange lihlezi phezulu kwengalane yeZifa Southern Division One lilemiklomelo engamatshumi ayisitshiya galombili lambili, amahlanu phezulu kweqembu leZPC Hwange elikunombolo yesibili kulogu.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds