uMthunywa
Bongani Ndlovu
“YEBO nkosi siyalivuma icala! Okusithume ukuyatshontsha yindlala lokukhanuka amanqina besicela uxolo siphambanisile asiphindi,” kukhala isibotshwa ngaphambi kokugetshwa imnyaka engu-9 ngumthethwandaba weBinga.
Kulabomakhelwane ababili beSiaMpongo 1 Village endaweni yaseChitongo ngaphansi kwenduna uSinamagonde eLusulu eBinga uTedious Mudenda (38 yrs) loFanuel Motolo (30yrs) aabgwetshwe ukuyapika ejele okweminyaka engu-9 ngemva kokutholakala belecala lokutshontsha inkomo efileyo.
Ekhuluma phambi kwenkundla umtshutshisi wecala uMnumzana Quite Mpofu ubikele inkundla ukuthi amadoda la womathathu awalabuhlobo njalo mhlaka 24 Nhlolanja lonyaka uTedious Mudenda loFanuel Motolo bathola inkomo kamamangala uMnumzana Moses Mwende weSiampongo 1 Village endaweni yeChitongo ngaphansi kwenduna uSinamagonde eLusulu eBinga ifile egangeni kulokuthi badinge umnikazi bakubona kungcono ukuthi beyihlinze babelane inyama besithi inkosi ayiphi esandleni.
UMnu Mwembe wadinga isifuyo sakhe esibiza imali engange USD$ 400 okwamalanga amabii ngaphambi kokuba ahlangane lesikhumba lenhloko kuphela. Ngokukhulu ukukhalipha uMnu Mwembe walonda inyawo ezamtshiya ngqwa emzini kaMudende owaveza ukuba ubeloMotolo lapho besenza icala lelo lenyama akade besalayo yathathwa njengobufakazi becala.
Ngemva kokulalelisisa icala leli umantshi uMnumzana Talent Phiri unike abasolwa ithuba lokuthi bancenge ukuthi baphiwe isigwebo esingcono enkundleni uFanuel Motolo wathatha lelo thuba waphendula wathi: “Yebo nkosi icala ngiyalivuma kodwa indlala lokukhanuka amanqina yikho okungenze ngatshontsha.”
Umantshi uMnu Talent Phiri ubathole belecala wasekubona kumele enze okutshiwo ngumthetho nanko phela kulicala ukutshontsha inkomo wabagweba iminyaka engu-9 yokutshontsha inyama yenkomo yiloba nje besithi bayithole izifele.
