uMthunywa
YiNtatheli kaMthunywa
ABEZIGAYO sebefake isicelo sokukhweza intengo yempuphu isuka ku$70 isiya phakathi kweUS$2,50 le US$3,50 i10kg ukuze benelise ukusebenza. Inhlanganiso yeGrain Millers Association of Zimbabwe (GMAZ) emele amankampani ezigayo amanengi, ngoLwesihlanu iveze ukuthi kuyadingeka ukuba ibeke intengo yempuphu ibe phakathi kwe-US$2,50 leUS$3,00 kumbe ibe yimali elingana lale eyakuleli kumaviki azayo.
Kusitatimende esikhitshwe ngemva komhlangano oqakathekileyo loHulumende kanye labanye abathintekayo koBulawayo, inhlanganiso le, iveze kabanzi inhlupho ebhekane lazo ekulwiseni ukusilela kwempuphu engaduliyo.
IGMAZ iveze ukuthi ukuthengisa impuphu nge$70 akusahambelani lesimo esikhona. UMgcinisihlalo weGMAZ uMnumzana Tafadzwa Musarara uthe abezigayo kunzima ukuthi bathole imali yakwamanye amazwe ukuze benelise ukuthenga umumbu, okuyisizatho esenza bakhweze intengo.
Ilizwe leZimbabwe lidinga amathani angu-1,8 miliyoni omumbu ngomnyaka njalo ilizwe lithenga umumbu kanye lengqoloyi kwamanye amazwe ngenxa yendlala eyabakhona elizweni.
