uMthunywa
YiNtatheli kaMthunywa
KULEZIZALWANE eziyisifica munwe munye zakweleMalawi ezeqe umgcele ezivinjwe ndawonye labanye abangu-32 ngemva kokweqa umgcele weSouth Africa okungekho emthethweni ezitholakale zilomkhuhlane weCovid-19.
Abayisificamunwe munye laba, bahle behlukaniswa labanye ehoteleni yeNational Social Security (NSSA) eBeitbridge. Abanye abangu-32 sebesiwe kumawofisi amela amazwe abo aseHarare nguHulumende kulindelwe ukuthi babiselwe kibo.
Iqula leli livinjwe izolo ngababona ngezokuphepha ngesikhathi lidinga inyawo ezilula zokuhamba kwabatshayela amagonyethi lapho okuma khona imota lezi.
UMqondisi weZenhlalo kugatsha olubona ngezePublic Service, Labour and Social Welfare, uMnumzana Totamirepi Tirivavi ufakaze ngalokhu lamhlanje.
“Iqula leli lihlolwe umkhuhlane weCovid-19 njalo abayisifica munwe munye sebehlukanisiwe eBeitbridge kulindwe ukuthi kwenziwe ama-PCR-tests,” kutsho yena.
“Laba bazavunyelwa ukuhamba nxa sebefanele ukuhamba. Sesihambise abangu-32 eHarare kulandela ukukhulumisana lewofisi emela ilizwe leMalawi kuleli.”
Kusenjalo, amapholisa alokhu esadinga abantu abangu-19 ababaleka eBeitbridge lapho ababevinjwe khona ngoMvulo ebusuku.
Labo ababalekileyo bayingxenye yalabo ababotshwa eLimpopo ababengenisa impahla etshiyeneyo ngokungekho emthethweni. Sokulabantu abangu-27 asebebaleke endaweni le kusukela kuqala ukusebenza indawo le.
Ngezikhathi zemini izolo, indawo le ibilabantu abangu-60, abesilisa abangu-33, abafana abanggu-7, abesifazana abadala abangu-15 lamantombazana amahlanu. Phezulu kwalokho, indawo le isetshenziswa ukuhlola abantu iCovid-19 kanye lokuhambisa izizalwane zakuleli ezivela kweleSouth Africa kuzabelo ezitshiyeneyo.
