uMthunywa
Intatheli kaMthunywa
KUSELE amaviki amalutshwane ukuthi kuvulwe inkundla zomdlalo kanobhutshuzwayo kodwa lokhe kungela ngitsho isitolo esithengisa izikipa zeqembu leHighlanders.
Nxa zikhona lezo zitolo, zithengisa izikipa ezithungwa emsamo ezibizwa ngokuthi ngamaFong Kong. Ukwanda kwempahla le engayisiyo, sekudale ukuthi iqembu lilahlekelwe yimali. Kuyamangalisa njalo ukuthi leqembu selikhethe ukuthi lingenzi lutho ngalokhu.
Ukuthengiswa kwempahla enjengale kuyasiza ukuthi iqembu lithole imali, njengalokho okwenziwa ngamathimu azwayo kwamanye amaligi.
Kuqembu leHighlanders kukhanya kusamnyama emehlweni lasengqondweni ukwazi ukuthi imali ivela ekuthengiseleni abalandeli izikipa.
Ngesizini edluleyo bekuyisimo esifayo lapho okuze kwaphela isizini kungela umlandeli olempahla yeBosso yakulezi insuku. IHighlanders icine ukuthengisa impahla yezikipa kubadlali ngesikhathi isekelwa yi-Adidas kumasizini adluleyo.
Sekuyinjwayelo esiyephule inhliziyo zabalandeli laba ukuthi bazagqoka izikipa zakudala emdlalweni. Bakhala besazesule bodwa abalandeli ngokuswelakala kwempahla yeqembu abalithandayo.
Kumbuthano wamalunga ayo oqhutshwe ekupheleni kukaZibandlela, iHighlanders yehluleke ukucaca mayelana lokuza kwempahla efana lezikipa. Kumasizini amabili adluleyo iBosso ibisekelwa yinkampani yeNetOne kodwa impahla yayo isebenzisa isidindo se-Roar.
Okudina abalandeli yikuthi izikipa ezikhona ayisizo zeqiniso kodwa bakhona osamabhizimusi asebethole imali ngokuthengisa.
Kudala iziphathamandla zeBosso zabeka isinqumo sokuthi akusoke kuvunyelwe ukuthengiswa kwempahla elophawu lweBosso ngaphandle kwesivumelwano.
Lokhu kwenza ukuthi kujeziswe labo abathengisa kuma-flea market, ezitaladeni. Owayetholakala ephethe impahla yethimu engaziwayo, wayethathelwa impahla le.
Ngokuya kwamasizini, isinqumo lesi asilandelwanga, kwavela amaFong Kong angafunwa ngabantu.
“I-kit entsha le ayikho ezitolo. Lathi singabalandeli sifuna ukugqoka lezo zikipa ezigqokwa ngabadlali. “Kuyadanisa ukuthola ukuthi inengi lethu ligqoka iFong Kong singabalandeli beqembu elikhulu elizweni,” kubika uDaniel Nkomo ongomunye wabasekeli abathintane lephephandaba likazulu.
Isikhulumi seHighlanders uRonald Moyo kazange abelethuba lokuphendula imibuzo evele kuntatheli kaMthunywa ngoLwesithathu. Ngesikhathi ethintwe ecingweni, uMoyo ukhethe ukuthunyelwa limbuzo ngemeyili ebulenjini, kodwa kwehlula ukuthi ayiphendule.
Ngesizini ka2017, iHighlanders yathola i$11 212 ithengise impahla ebalisa izikipa lezi ezikhalelwa ngabalandeli bayo. Ngo-2016 yathola $12 000. Ngaleso isikhathi kwakuthenga imali yeMelika kuleli.
