uMthunywa
Nkosilathi Sibanda
UKUDLALA kuhle okwenziwa liqembu leHighlanders kulezinsuku sekudale ukuba elinye ihlekana labalandeli balo lehluleke ukulala emakhaya alo, nanko sekukhanya lokuthi “ukuhlanyiswa” liqembu leli sekungabhidliza lemizi, uMthunywa uyakuveza lokhu lamuhla.
Iphephandaba likazulu lilobufakazi obukhulu bokuthi kulabasekeli beBosso abathaba bedlulise amalawulo, abathi nxa umdlalo uphela, bakhethe ukutshona bezitika ngenjabulo, bakhohlwe ukuphindela emulini zabo, kube labanye abafika emathathakusa.
Umzekeliso wakuqala kulokhu uvela kuzhizhi lwabasekeli baleliqembu, abalandela imidlalo yalo nxa isendleleni. Akulaqembu eselitshengisele ukuthi lilabalandeli abanengi, ababukeli imidlalo yalo yonke okwedlula iHighlanders. Inhlanganiso yePremier Soccer League iyakufakaza lokhu.
Kungabe kukuhle ukusekela iqembu kodwa ukungalali emakhaya ngenxa yeBosso sekuvuse inkulumo ezingapheliyo emakhaya, nanko lakunkundla zokuxhumana ebulenjini sekuyindaba esegudwini.
Iphephandaba likazulu belikhona mhla iHighlanders ivakatshele enkundleni yeBata, ekhaya leqembu leSheasham ngeSonto edluleyo. Kulabalandeli okubikwa bayehluleke ukuphenduka koBulawayo ngoba besele eGweru bezijabulisa.
Isehlakalo esivuthise inkulumo ebulenjini yileso esesisabalale kuWhatsApp lakuTwitter, lapho enye indoda ebisola isithandwa sayo ukuthi kungani sithanda iBosso.
Ingxoxo phakathi kwezithandani lezi isisabalale okuzwayo, yaze yabasemlonyeni yabalandeli bomdlalo kwamanye amaqembu.
Intombi le, elandela imidlalo yeBosso yonke, itshele isithandwa sayo ukuthi ithanda iBosso ukwedlula yona, okucasula lindoda kakubi.
“Ngiyakuthanda sibili, kodwa iBosso ngiyithanda ukwedlula wena…,” kubika intombi le.
Eqinisweni, minengi imndeni okuxatshanwa khona ngenxa yokuthi omunye uthanda umdlalo wenguqu aze akhohlwe imuli yakhe. Lakumidlalo yaphetsheye eye-English Premier League kukhona. Kulesitsho esikhulunywa ngabalandeli beHighlanders esithi “Ozonda iBosso uzonda unina” esichaza sobala ukuthi leliqembu lihamba phambili.
Intatheli yephephandaba likazulu ixoxe labalandeli baleliqembu ababeke imibono etshiyeneyo mayelana ngendaba le yokusekelo olwedlulisileyo.
UNaison Nkathazo obika ukuba ulandela yonke imidlalo yeBosso nxa isendleni, uthe nxa esuka emzini wakhe uyabika ukuthi uzaphuza ukuphenduka.
Abalandeli bebosso
“Impelaviki ngeyeBosso kimi. Umkami uyakwazi lokhu,” kutsho uNkathazo.
“Ngilala ngisemzini wami kodwa ngiyaphuza ukufika ngoba nxa ithe yadlala kuhle, kubanzima ukuthi ngibalekele ukujabula labanye.”
Kumdlalo weBosso leSheasham, intatheli yazibonela mathupha ukuthi iBosso “iyahlanyisa”. Bakhona abaphenduke emdlwalweni bedakiwe, abanye ngababotshelwe ubudlwangudlwangu, kuthi abanye ngabakhethe ukuthi balale emabhawa bavukele emakhaya kusisa ngoMvulo.
Phakathi kwabantu laba, kulamanina lamadoda akhokhela imizi.
Omunye wabalandeli obeseGweru, uPetronella Moyo uthe okunye okwenziwa ngabasekeli beHighlanders kuyayangisa.
“Ngiyayithanda iHighlanders kodwa ngicasulwa yikuthi abanye bathu bayedlulisa amawulo, ikakhulu nxa sidlalela khatshana. Uyathola umama okhulileyo esedakwa, apesuke indlela yonke, akhohlwe lokuthi uyangaphi. Angisoli kangako, kodwa ngithi siziphathe singabantu,” kutsho lelinina elilandela imidlalo yeBosso, elibike ukuba lihlala eKensington.
Kusenjalo, imidlalo kuligi yeCastle Lager iyaqhubeka kulimpelaviki.
IHighlanders isekhaya leqembu leSimba Bhora Emagumeni. Kweminye imidlalo ekhona koBulawayo, abafana bakaLizwe Sweswe bakhangelelwe ukuqhubeka ngegiya labo lokunqoba behlangana leSheasham eLuveve.
Imidlalo ngokugcweleyo:
NgoLwesihlanu: Craneborne Bullets v Greenfuel (National Sports Stadium)
NgoMgqibelo: Bulawayo Chiefs v Sheasham (Luveve), Herentals v Dynamos (National Sports Stadium), Manica Diamonds v Chicken Inn (Gibbo)
NgeSonto: Highlanders v Simba Bhora (Barbourfields), CAPS United v Hwange (National Sports Stadium), Ngezi v FC Platinum (Baobab)
NgoMvulo: ZPC Kariba v Black Rhinos (National Sports Stadium)
