uMthunywa
KULOMNTWANA oleminyaka emibili wesigabeni seMulwanda eKenya, ongcwatshwe ephila egodini ngabanye abantwana akade edlala labo abathathu.
Umuyi oyintombazana kubikwa wayesele logogo wakhe njalo wayedlala labanye abantwana abaleminyaka emihlanu, loleyisithupha kanye loleyisikhombisa.
Kubikwa abantwana laba bagebha igodi emva kwendlu balithela amanzi andubana bafuqele umntwana lo phakathi baligqibele.
Sebebona ukuthi umntwana lo wayesehitshwe waze wafa badonsa isidumbu sakhe basikhupha andubana bayesitshiya eceleni kwepulazi lamabhanana.
Kucatshangelwa ukuba lo oleminyaka eyisikhombisa wahle wabaleka esesaba ukuthi uzenziwani.
Isidumbu sikamuyi sabonwa yizakhamizi.
Uyisemkhulu kamuyi uthe: “Sicabangela ukuthi abantwana babezidlalela bengaboni cala bezama ukulingisa abababone kusenziwa emingcwabeni.”
Uthe ngemva komngcwabo womzukulu wakhe bazagezisa abantwana laba abalesandla ekufeni kwakhe.
“Nxa singekela ukubagezisa bangaba leziqalekiso njalo labo bangehlelwa ngamashwa afanayo,” kutsho ukhulu lo.
UWestern Region Police Chief uMoses Ombati uthe ukufa komntwana lo kwaba yingozi.
“Sivule idokethi njalo sizathatha izitatimende zabafazi andubana sise lokhu kumantshi,” kutsho uOmbati. — Ubulembu
