‘Abantwana balambile Johnfat’

10 Jun, 2021 - 00:06 0 Views
‘Abantwana balambile Johnfat’ uJohnfat Sibanda

uMthunywa

YiNtatheli kaMthunywa
UKUKHALALA ukudlala okwenziwe ngabadlali beHighlanders ngenxa yokungaholi kuveza ukuba iqula labaphathi baleliqembu elikhokhelwa nguJohnfat Sibanda kungenzeka ukuthi liphelelwe ngamacebo.

Abalandeli baleliqembu babika ngokucunuka okukhulu ukuthi umgcinisihlalo lo kukhanya uyehluleka ukudinga iqhinga elitsha lokwenza iqembu lenelise ukuthola imali eyeneleyo. Abadlali sebekhalale umsebenzi okwesibili iviki ingakapheli.

Ngeviki edluleyo bafike bawothamela ilanga enkundleni yeWhite City betshela umqeqetshi ukuthi angeke bagijime belambile. Kuliviki ngoLwesibili langoLwesithathu, abadlali bacabange ukuthi bayethule amajogwe futhi, besithi bafuna imali yabo.

Iphephandaba likazulu alisatholanga kakuhle ukuthi abadlali bafuna malini kodwa udletshana olukhona yikuthi lokhe iHighlanders yaqala ukuncintisa kunkezo yeChibuku Super, abadlali baphiwa imali kanye kuphela.

IBosso ayikanqotshwa kumidlalo yalumkhankaso wenkezo eyayithwala ngesizini edluleyo.

Kulandela ukuzwa ngesimo sabadlali, uMthunywa ubuze abalandeli beqembu imibono yabo ngalokhu.

Bakhona abacele ukuthi uSibanda lezinye inkokheli ziphumele egcekeni ngokuphawula isimo sesikhwama sethimu.

Ukudinga amacebo angavuselela iqembu kumqoka ngokutsho kwabalandeli.

Njengawo wonke amaqembu akuligi yePremier Soccer League, iHighlanders ithembele kumali ebhadalwa ngababukeli bemidlalo yayo. Kodwa, lonyaka ababukeli abavunyelwa ukungena enkundleni ngenxa kokumemetheka kwegcikwane leCovid-19, amaqembu azadlala kungela bantu.

USamuel Sikhosana odabuka eNkayi olilunga leHighlanders okusemthethweni utshele intatheli ukuthi sekuyisikhathi sokuthi abaphathi beqembu badinge ezinye indlela zokuncedisa.

“Umsebenzi kaJohnfat Sibanda, umgcinisihlalo esamvotelayo yikuthi adinge amacebo wokuthi isehlakalo esinje singaphindi futhi. Yiwo phela umsebenzi wabo,” kutsho uSibanda.

“Singasoli abafana ngoba angeke badlale belambile. Siyathaba uma benqoba imidlalo kodwa sikhohlwe ukuthi labo ngabantu abafuna ukugcina imuli zabo.”

Ukukhalala ukulolonga lokudlala okwenziwa liqula labadlali beBosso akuqalisi. Iminyaka yonke akupheli isizini bengazange bakhale ngemali.

UTymon Ndlovu oweGwanda uthe inkinga le ingaxazululwa yikudinga inkampani engancedisa ngemali.

“Akulula ukuba sesihlalweni sikamgcinisihlalo omutsha lo. Ukuswelakala kwenkampani engajikela loba yini engaphakamisa abadlali kubalulekile. Sihlala sikhuluma ngakho njalonje ukuba manengi amankampani akoBulawayo afuna ukuphathisa iHighlanders kodwa akulamuntu owalandayo. Ogulayo nguye odinga inyanga bakithi,” nguNdlovu lo.

Ukuqhubeka kwesimo lesi kubonakala kungaphazamisa amalungiselelo eqembu kunkezo yeChibuku Super efunwa ngumqeqeqtshi uMandla Mpofu ngamehlo abomvu.

Ekhuluma lephephandaba likazulu ngoLwesithathu, umqeqetshi lo uthe angeke atsho okunengi ngoba okwakhe yikulungiselela iqembu.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds