Uncategorized

Abangu-3 badubule, bafaka isidumbu ku-drum

12 May, 2022 - 00:05 0 Views
Abangu-3 badubule, bafaka isidumbu ku-drum uInspector Abednico Ncube

uMthunywa

Thokozile Mbedzi 

KUDABA oluhlasimulisa umzimba kulamadoda amathathu akoBulawayo adubule enye, asefaka isidumbu phakathi kwesaka andubana asifake ku-drum basiphosele phakathi komgodi, uMthunywa uyakuveza lokhu lamhlanje.

Inkemenkeme le yenzakale kuviki ephelileyo eHope Fountain indawo ebucwadlana ledolobho lakoBulawayo lapho uDecent Ngwenya oleminyaka engu-22 yokuzalwa adutshulwe wabulawa ngombhobho wohlobo lweRevolver.

Kubikwa uPrince Ncube oleminyaka engu-36 we Happy Valley Mine, uGodknows Ncube oleminyaka engu-30 weHope Fountain loDirector Sibanda oleminyaka engu-28 weMatshobana koBulawayo bathelele uNgwenya bamdubula wafa ngemva kokungazwisisani ngesizatho esingakazakali. 

Abathathu laba sebembulele kubikwa bamfaka phakathi kwesaka basebelifaka kudilamu andubana bayiphosele phakathi komgodi okwenjiwa igolide kuwo.

Ekhuluma lentatheli kaMthunywa uMnumzana Mengezi Ndlovu uthe lokhu bekhakhamele ngalokhu abakubonileyo.

“Silokhu sitshe amathe, inzima indaba elapha.

Kulamadoda amathathu abe lokungazwisisani, omunye wabo wasedubula uDecent.

Bebona ukuthi sefile bamfaka phakathi kwesaka bathatha i-drum bamfaka phakathi bayivala andubana bayiphosele phakathi komgodi okwembiwa igolide.

“Kukhanya amadlozi akwabo ala ukuthi alobe nje, nanko izisebenzi zemgodini lo zithe sezingena emsebenzini zadibana lenkemenkeme le.

Ukhona owayebonile lokhu kusenzala wahle wazisa amapholisa lawo angazange adonse inyawo ngoba ahle azofika achwayisisa,” kulandisa uMnu Ndlovu. 

Isikhulumi samapholisa koBulawayo uInspector Abednico Ncube sikuqinisekisile ukuthi kulecala lokubulala elichwayisiswa ngamapholisa.

“Amapholisa akoBulawayo achwayisisa ngecala lokubulawa kwendoda eleminyaka engu-22, ephinde yafakwa esakeni andubana iphoselwe emgodini.

“Njengamapholisa silokukhathazeka ngengamacala kunye lengozi enzakala endaweni lapho okwenjiwa khona igolide.

Sikhuthaza uzulu ukuthi nxa kulokungazwisisani kababikele amapholisa loba abogatsha olubona ngezokwenjiwa ukuze singalahlekelwa yimpilo ngendlela ezinje,” kuphetha ulnsp Ncube.

Share This:

Sponsored Links