uMthunywa
Msilisi Dube
ABALIMI begwayi eMguza bakhala ngokuswela indawo zokomisela igwayi labo (curing barns) okuyinto esibangela ukuba baphelelwe luthando lokulima isilimo lesi, kuthi labo abasilimileyo bacine bengalithengisi ngentengo abayikhangeleleyo ngoba lingalungiswanga ngendlela eqondileyo.
Eminyakeni edluleyo kubikwa abalimi abanengi bebelimela ize ngoba becine beswela ama barns okomisa isilimo sabo.
Ekuvakatsheleni kulumango ngeviki edluleyo abalimi abanengi baveze ukuba behluleka ukulima isilimo segwayi lonyaka ngoba bengelandawo lapho abangomisela khona igwayi labo. UMnumzana Shadrek Ndlovu olima epulazini leZivuseni uthe lonyaka kenelisanga ukulima isilimo lesi ngoba engelandawo zokomisela isilimo lesi njalo kalalwazi olweneleyo ngokuthi sonyiswa njani.
“Ngangilime ihekitha eyodwa yesilimo lesi ngomnyaka ophelileyo. Ngazama ukwakha indlu yokomisela isilimo lesi kodwa ngehlulwa zimali zokuyiqedisa.
“Isilimo lesi ngasivuna ngasifaka emasakeni saze sabola ngenxa yokwehluleka ukuba ngisilungise ngendlela eqondileyo.
“Okunye okwangenza ngekela ukusilima lonyaka yikuthi igwayi lifuna umuntu ololwazi olweneleyo ngokusilima kunye lokuvuna,” kutsho uMnu Ndlovu.
Omunye umlimi uNkosazana Molly Ncube uthe ukusilela kwemali zokwakha indawo zokomisa igwayi kwenza bengalilimi kakhulu.
“Isilimo segwayi siyavuma kulindawo kodwa yikuthi indawo zokokusomisela ziluhlupho. Kulabanye abalimi abalazo indawo lezi kodwa bayadula kakhulu. Isaka le-50kg bathi yi $50 ukuze bakomisele okuyimali esingayenelisiyo,” kutsho uNkszn Ncube.
