uMthunywa
Listen Ndlovu
ABALIMI abaphiwa inhlanyelo ngaphansi kohlelo lukaHulumende olwePresidential Input Support Scheme kunyanga kaMpandula nyakenye sebaqala ukulima ukudla kwenkomo zabo okulinyathelo elizabasiza ukuthi iinkomo zabo zibe lokudla okuzenza zehlise kuhle.
UMnunzana Cosmas Muzunde onguDairy Officer koBulawayo ubike ukuba: “uHulumende waqala uhlelo lokuxhasa abalimi abalenkomo ezibanika uchago olungaphansi kwesilinganiso se 200 litres ngelanga ngemva kokunanzelela ukuthi sokulokuswelakala kochago elizweni”.
‘Abalimi bendaweni zeMatabeleland North le South abalenkomo ezibanika uchago olungaphansi kwesilinganiso se 200 litres ngelanga bacelwa nguHulumende ukuba baphatheke kuloluhlelo ukuze basizakale bathole ukudla kwenkomo okwaneleyo ukuze bazuze uchago olunengi”, kutsho uMnunzana Muzunde.
Uqhubekele phambili wathi: “abalimi abenelisayo ukungena kuloluhlelo lukaHulumende bathola ifethalayiza kanye lenhlanyelo yomumbu ngakho sebeqalisile ukulima ukuze bathole ukudla kwenkomo okwaneleyo okuzancedisa njalo ukuthi inkomo zabo zibanike uchago olunengi”.
Ubike njalo ukuthi loluhlelo lwaqalwa ukuze abalimi baphathiseke bangacini bethengisa inkomo zabo ngenxa yokuswela ukudla kwazo.
“Abalimi abanengi abalakho ukudla kwenkomo njalo bacina bethengisa ezinye ukuze bathenge ukudla kwazo kuthi nxa bengenelisanga ukuthenga ukudla inkomo zingehlisi kuhle.
“UHulumende wanika abalimi inhlanyelo abayithatha eGrain Marketing Board ukuze benelise ukuthi balime ukudla kwenkomo bengacini bethengisa inkomo loba behlale bethenga ukudla kwenkomo ngakho lokhu kubasiza ukuthi benelise ukunika inkomo zabo ukudla okwaneleyo ukuze ibhizimusi le Dairy Production liqhubeke kuhle’, kutsho uMnunzana Muzunde egqiba inkulumo yakhe.
