uMthunywa
Thokozile Mbedzi
INHLANGANISO yeAgritex isikhuthaze abalimi abalima izilimo elizweni lonke ikakhulu endaweni ezingelamanzi ukuthi bathathele phezulu indlela yokulima yesivande esilibhokisi (i-garden box) yona efakwa iphepha lepulasitiki phansi ukwenzela ukugcina ubumanzi.
Ekhuluma lephephandaba likazulu uNkosazana Stella Rombe ongumlimisi koBulawayo uthe bona njengenhlanganiso yeAgritex sebephenyisise kabanzi bakubona kufanele ukuba abalimi balandele lindlela yokuba balondoloze ubumanzi ikakhulu endaweni ezilamanzi amalutshwana.
“Abalimi kumele balandele lindlela entsha yokulima eyebhokisi ikakhulu endaweni ezingelamanzi ngoba lindlela iyalondoloza ubumanzi. Indlela le ingasetshenziswa kakhulu kusukela ngenyanga kaMabasa kusiya kuLwezi.
“Umlimi kumele abelesilinganiso esingaba yi-1m x 2m lapho afisa ukulima khona loba afake khona izilimo zakhe abesegebha i20cm kusiya ku-23 ukutshona phansi. Angenza njalo kumele afake inhlabathi ayikhiphe kulelogodi eceleni abe sesendlala iphepha lepulastiki elimnyama libotshelwe emaphegini ngentambo ye-blair twine elingalazikhala ukwenzela ukugcina ubumanzi,” kuchasisa uNkszn Rombe.
“Inhlabathi leyo iyahlanganiswa lomquba kusetshenziswa isilinganiso sefotsholo eyodwa yomquba lefotsholo ezintathu zenhlabathi (1:3 ratio). Kube sokufakwa utshani lamahlamvu besokufafazwa i-Carbarly 85%WP ukuvikela umuhlwa.
“Inhlabathi le esihlanganiswe lomquba yiyo esetshenziswa ukugqibela igodi kusale kulingene ukuze lamanzi ame nxa sokuthelelwa. Umlimi angenza njalo uyabe ekhangelelwe ukuthelela leyondawo okwamalanga amathathu andubana ahlanyele izilimo afisa ukuzihlanyela,” kuchaza uNkszn Rombe.
UNkszn Rombe uthe umlimi ukhululekile ukulima loba yisiphi isilimo esilinywa esivandeni.
“Izilimo ezihlanyelwa kulindlela yebhokisi ngezivame ukuhlanyelwa ezivandeni ezibalisela imiqwente, ihanyanisi, indumba, ikhabitshi, itshomoliya, idelele, amatamatisi, i-rape, spinach, eggplant, garlic, itsunga, squash, beetroot, lettuce lezinye izilimo ezingathandwa ngumlimi esivandeni.
Uphethe ngokukhuthaza abalimi ukuthi kabathathele phezulu lindlela yokulima ngoba indawo ezinengi kazizange zibe lezulu elinengi.
