uMthunywa
YiNtatheli kaMthunywa
ABALIMI begwayi kulesisigaba bazanikwa i-60 phesenti yemali yabo yesilimo ingeyakwamanye amazwe, isuka ku-50 phesenti kusigaba esedluleyo, nanko phela uHulumende uhlose ukulungisa izikhalazo zabalimi ekubhadalweni kwabo kunye lentengo.
Isigaba sokuthengisa sika2021 sikhangelelwe ukuqalisa loba nini ngemva kokuba uHulumende kunye lezinye inhlanganiso ezithintekayo zingaqeda ukulungisa okubalulekileyo.
UMphathintambo wogatsha lwezoMhlabathi, Ezokulima, Ezamanzi kunye lokuhlaliswa kutsha emaphandleni uDokotela Anxious Masuka kuviki ephelileyo uthe sebeqalisile ukukhulumisana ukuze kuqinisekiswe ukusebenza kuhle kubhizimusi leli.
UDkt Masuka uthe ukuvulwa kwama-auctions okuthengiswa kwegwayi sokuseduze wengeza ngokuthi uHulumende ukhulumisana labathengi kunye lebhanga lesizwe eleReserve Bank of Zimbabwe kunye labameli babalimi abaveza izigaba abafisa ukuthi zilungisiswe lonyaka.
UDkt Masuka ubephendula imibuzo ePhalamende lapho achaze ukuthi iRBZ ibeke izindlela zokuqinisekisa ukuthi umuntu wonke ohambisa izilimo kwamanye amazwe uzathola isiphatho esifanayo njalo abalimi bakhangelelwe ukuthi bathole isilinganiso se-60 phesenti siyimali yeMelika.
Nyakenye abalimi begwayi bahambisa isilimo sabo kusetshenziswa izinga lokutshintshaniswa kwemali elisemthethweni, lapho iUS$1 eyayiyi ZWL$25, okuyiyo eyayikhona ngaleso sikhathi.
Kusenjalo, ibhodi yeTobacco Industry and Marketing Board (TIMB) isithembise abathengisayo ukuthi kulendlela zokuvikela ukumemetheka kweCovid-19 ezilungiswayo ukuze abathintekayo bavikeleke.
Abalimi bakhangelele isivuno esiphezulu ngenxa yokuba izulu laba linengi lonyaka njalo kukhangelelwe ukuthi kutholakale isilinganiso se200 million-kilogramme kusuka kumakhilogilamu angu-185 miliyoni ngo2020.
