YiNtatheli kaMthunywa
ICHICKEN Inn ingena inkundla ihlulukelwe okokuthi izaphephela phezulu kweziqhulayo iBulawayo Chiefs kumdlalo wetshumi lanhlanu kuligi yeCastle Lager.
AmaGamecocks asekholisa ukuhamba ngebhasi entsha evela kunkampani yeNyaradzo anxusa omakhelwane bayo evela tshaywa yiHwange 2-1. Amakhosi wona anqobe nge 1-0 kuManica Diamond ngempelaviki edluleyo.
Kungenzeka iBulawayo Chiefs ibisivuke khwatshu ithole ukunqoba njalo kulumdlalo. Kodwa umdlali weChicken Inn uSimon Munawa walile ukuthi bazanqotshwa.
“Umdlalo lo siwulungiselele. Akula qembu esilidelelayo ngoba siyazi ukuthi nxa sifuna ukuthatha iligi, kumele sinqobe wonke amaqembu,” kutsho lumdlali osephenduke wabayingcitshi esiswini senkundla.
Ebuzwa ngamalungiselelo akhe kulumdlalo, umqeqetshi weChicken Inn uJoey Antipas uthe uwulindile umdlalo.
Loba iBulawayo Chiefs ithabile ekutholeni ukunqoba ngemva kwemidlalo eminengi, leliqembu lilohambo olude ukuze liphume kuhlandla lokususwa kuligi ephakemeyo.
Umqeqetshi wayo uThulani Sibanda uhlala elethemba, lakukhasi leTwitter, leliqembu lisaphethe ithemba.
IBulawayo Chiefs isiliqembu elibonakala kakhulu kubulembu beTwitter, osekwenze abanye abalandeli beyikhuthe lasenkundleni.
Okwamanje iBulawayo Chiefs ithola abalandeli abatsha malanga wonke kuTwitter kulamaqembu wonke kuligi.
Kubikwa lokhu yikho osekunikeze leliqembu idlabuzane lokunqoba ukuze lenqabele ukuphuma kuligi yeCastle Lager.
Kuminyaka emibili likuligi enkulu, iBulawayo Chiefs isithole abalandeli abangakaze badonswe ngamaqembu alodumo ngesikhathi esifitshane.
Imidlalo yePSL:
NgoMgqibelo: FC Platinum v Chapungu (Mandava Stadium), Chicken Inn v Bulawayo Chiefs (Luveve Stadium), Ngezi Platinum v Black Rhinos (Baobab Stadium), Herentals v Hwange (NSS), ZPC Kariba v Triangle United (Nyamhunga Stadium), Yadah v Harare City (Rufaro Stadium).
NgeSonto: Dynamos v Caps United (Rufaro Stadium), Manica Diamonds v Highlanders (Vengere Stadium), TelOne vs Mushowani (Luveve Stadium).
Yonke imidlalo iqalisa ngo-3pm.