uMthunywa
Nkosilathi Sibanda
“Inguqu ikhipha abadlali abasakhulayo esitaladeni, ibavulele amathuba, bagxile ekwenzeni okuhle empilweni zabo…”
Lokhu kukhulunywe ngusaziwayo kumdlalo wenguqu uMadinda Ndlovu ngemva komqhudelwano we-Fortune “Fokoza” Ncube Foundation Under 15, obuselokitshini leNtumbambe ngoMgqibelo.
UMadinda, obengomunye wabahlonitshwa kulumqhudelwano, uncome ngokuphezulu abaqoqi bomncintiswano lo ngoba basebenzisa umdlalo wenguqu ukuvikela abasakhulayo engozini zokutshona ezitaladeni.
Usaziwayo lo, owadlalela iHighlanders lama-Warriors ujabule kakhulu sekunqobe iqembu leBinga Soccer Academy, elidabuka lapho avela khona.
“Okuhle kikho konke yikuthi kuleqembu lakithi eBinga, elinqobileyo,” kutsho uMadinda, owaphinda wazakhela udumo eqeqetsha iHighlanders.
“Okwenziwe nguFokoza kungumsebenzi omuhle, oncomekayo ngoba ukhulisa inguqu elizweni lonke.”
IBinga Soccer Academy ithole isicoco sesihlanu somqhudelwano weFortune “Fokoza” Ncube Foundation Under-15 oqhutshelwe enkundleni yeSporweni Grounds ngoMgqibelo.
Umqhudelwano lo uphenduke ususezingeni eliphezulu ngemva kokumiswa ngenxa yomkhuhlane weCovid-19. Kuphatheke amaqembu ayisitshiya galombili abalisela iBinga Soccer Academy, Fusini, Chicken Inn, Entumbane Stars, Asante Sana, Real Stars, Super Nets leThorngrove.
Inhloso yalumqhudelwano yikusiza umphakathi ukuthi ulwe lokusetshenziswa kwezidakamizwa lokunikeza abantwana abalethalenta ithuba lokuzitshengisela enkundleni.
uMadinda Ndlovu
IBinga Soccer Academy inqobe nge 1-0 kuReal Stars kuhlandla lama-quarterfinal yaphinda yanqoba i-Asante Sana ngempumela efanayo ku-semi-final ukuze ingene kowokucina lapho eyehlule khona iNtumbane Stars ngebhola elilodwa.
Ngokunqoba kwabo, abafana beBinga bathole isicoco, imendulo lamabhola okudlala. Loba iNtumbane Stars yehluleke ukuthi ivikele umdlalo ekhaya layo, iphiwe imendulo, amabhola lezikipa. Wonke amaqembu aphatheke kulumncintiswano athole amabhola okudlala.
Umdlali obonakale edlale ukwedlula bonke kube nguPaul Nguzuzyaleza Mwembe oweBinga kwathi umqeqetshi wakhe uPride Ngwenya ukhethwe njengomqeqetshi kuzwa. Umdlali uMuleya nguye ohlohle amabhola amanengi.
Omunye wabaqeqetshi oncedise ukuqoqa umncintiswano lo, uAbraham Mbaiwa uthe imidlalo enjangale iyaphakamisa abadlali.
“Akulanto ekhuthaza umdlalo osakhulayo njengokusekelwa ngaloluhlobo,” kutsho uMbaiwa oselolonga abadlali beBulawayo Chiefs.
Umsunguli womncintiswano uFortune “Fokoza” Ncube wadlalela amaqembu ambalwa abalisa iHwange, Bulawayo Chiefs, Bantu Rovers, Black Mambas leMotor Action.
iBulawayo Chiefs
Watshiya ukuba ngumdlali ngenxa yokubanjwa ngumkhuhlane wamehlo okwenza waqinela ekuqeqetsheni lokuthuthukisa abasakhulayo.
Okwamanje uqeqetsha kwelinye ikolitshi laphezulu kunguqu eSouth Africa.
Umsebenzi wokuba ngumqeqetshi wawuqala ngomnyaka ka2012 esebenza leChristian Saints Academy eyeHarare njalo wake wasebenza loPeter Ndlovu kusukela ngalowomnyaka. Usebenze njengomasekeli kamqeqetshi kuqembu le Arenel Movers elidlala kuDivision Two lakuqembu leZRP Beitbridge esengumqeqetshi.
Lonyaka bekunyakazela ngabalandeli benguqu, abahlonitshwa kubahlali beNtumbane lamalokitshini aseduzane. Osaziwayo kunguqu, abadla ubhedu abadonse amehlo ababukeli babalisa uMadinda Ndlovu, uGift Lunga Senior loZenzo Moyo.
