uMthunywa
YiNtatheli kaMthunywa
INHLANGANISO yeZimbabwe Boxing Federation ibika ukuba isikhethe ukuthi ithumele iqula labadlali abazaphatheka enkundleni zeWorld Olympics Qualifier.
Iqembu lesizwe kulumdlalo lokhe lizama ukuthola ithuba lokuthi lifinyelele kumncintiswano yama-Olympics ahlelwe ukuqhutshwa edolobheni lase-Tokyo, eJapan phakathi komnyaka.
Lokhu kuza ngemva kokutshaywa kwabadlali bakuleli kusigaba sakuqala esaqhutshwa kwele-Senegal ngomnyaka odluleyo.
Kubadlali abakhangelelwe ukungena enkambeni yokulolonga kubalisa uTrade Nkomozabo, Ndabezinhle Photo, Sibusiso Nyoni, Agnes Kwashi, Rudi Maphosa loTendai Tigere.
Iphephandaba likazulu lixhumane lomqondisi weZimbabwe Boxing Federation uSteven Masiyambumbi othe abasoze balahle imbeleko ngokufelwa kumzamo yabo yokuya kuma-Olympics.
Uthe banengi abajiki benqindi asebefakwe ehlelweni lokulolonga, kulungiselelwa imidlalo ezayo.
“Lokhe sisilwa, sifuna ukuthola ithuba lisisebenzise,” kutsho uMasiyambumbi.
“Sisakhona kulumkhankaso wokuya kuma-Olympics.Ngesikhathi abadlali bethu betshaywa eSenegal, kwatshengisa ukuthi sasingazimiselanga kangako.
“Siqoqe iqembu elizakulwa kumkhankaso ozayo. Bekukhona okusiphazamisileyo okufana lobhubhane lolu olwe-Coronavirus kodwa iqembu lihlangene.”
Umdlalo we-boxing umisiwe okwakhathesi ngenxa yomkhuhlane we- Covid-19.
Umqondisi weZBF uthe abadlali balolonga bebodwa njalo abaqeqetshi babumba uhlelo oluhambelana lomdlali munye ngamunye.
