uMthunywa
Nkosilathi Sibanda
UMGCINISIHLALO weHighlanders uKenneth Mhlophe usegcizelele ngokukhuthaza abadlali, abaqeqetshi lamalunga eqembu leli ukuthi bazibambe ngokuqhubeka bezivikela kumkhuhlane we-Covid-19.
Ngomnyaka odluleyo, kuqale ukumemetheka kwegcikwane leli, uMhlophe wabika njalo ukuthi iHighlanders izaqina ngokuhlolisisa ukuthi abadlali bayo bayenqabela umkhuhlane ngendlela efaneleyo.
Umdlalo wenguqu wacina ukudlalwa ngesizini ka-2019 ngenxa yegcikwane leCovid-19. Abadlali beHighlanders, njengabanye kwamanaye amaqembu sebeqede umnyaka ogcweleyo bengadlali.
UMhlophe ubeke inkuthazo ngokuvikela lumkhuhlane ngesikhathi uhulumende evumele ukuthi abantu babuyele emsebenzini.
Ukudlalwa kwenguqu akukabikwa.
Kungumbono kaMhlophe ukuthi ukuvikela abadlali lomphakathi kumqoka ngalesi isikhathi. Kungxoxo encane abelayo lentatheli kaMthunywa ngoLwesibili, uMhlophe uthe kuqakathekile ukulandela izinqumo zokuvikela igcikwane.
Kumbiko wakhe uMhlophe uthe: “Singalandela zonke izixwayiso zokuvikela iCovid 19.
“Ngengabaphathi bethimu yeHighlanders, sikhuthaza abadlali, abaqeqetshi, izisebenzi labalandeli ukuthi bahlale beqaphele. Njengoba sisalinde ukuphenduka komdlalo, kulithemba lethu ukuthi sizadlala lonyaka.”
Uthe isicebiso esikhulu abasinikeza abadlali yikuthi bahlale behlanzekile.
“Sikhuthaza abadlali lezisebenzi zethu ukuthi ziziphathe, zenqabele ukuba yingxenye yembuthano ngalesi isikhathi,” kutsho uMhlophe.
Umgcinisihlalo lo, othe efika kuHighlanders iqembu laqala ukusukuma libonakala ngokuthwala inkezo ye-Chibuku Super, uthe bakhathazekile ngokuza kweCovid-19 kuleli.
“Iqembu likhathazekile ngokugcwala kwaleligcikwane umhlaba wonke, ikakhulu ngokufa kukaZororo Makamba. Sikhala lemuli yakoMakamba lelizwe lonke ngalesi isikhathi.”
Imidlalo yakulisizini akwaziwa ukuthi izaqalisa nini nanko lenhlanganiso yePSL isalinde uHulumende.
