uMthunywa
Nkosilathi Sibanda
BASELE betshelwe ngamathe abaqoqi labaxhasi bomncintiswano we-basketball koBulawayo kulandela ukukhalala umdlalo okwenziwe ngamantombazana eqembu leJBC.
Umncintiswano lo oqhutshwe yiBulawayo Basketball Association (BBA) labasekeli bayo, ubunxuse amaqembu aphuma endaweni ezitshiyeneyo zelizwe ngoMgqibelo.
NgoLwesithathu, iphephandaba likazulu lizwe kubafakazi abaqotho ukuba ngenxa yesenzo sabadlali beJBC, inhlanganiso yeBBA isilobele inhlanganiso yeBasketball Union of Zimbabwe (BUZ) mayelana ngokuziphatha kweqembu leJBC kumncintiswano lo obuseKhanyisile Sports Centre.
Kubikwa abaqoqi bemidlalo bazonde bagane unwabu nanko phela imizamo lemisebenzi yabo yokuphakamisa umdlalo isuke yangabi lempumelelo.
Umncintiswano lo ubulesisindo ngoba usekelwe yiKhanyisile Holdings, iBig Five Events ebalisela abathandi labaxhasi bomdlalo uDurral Adams, Kimble Rogers, Barry Bedder, Emity Smooth loMark Vusani.
Abaxhasi laba basuke bedanile. Imali ebitholwe kumidlalo le kubikwa izancedisa ekulungiseni inkundla zeKhanyisile Sports Centre, ngenjongo yokuthi kube lenkundla ezinengi. Okwamanje amaqembu asebenzisa eyodwa.
Abadlali beqembu labesifazane be-JBC baphume enkundleni betshingela ukuthi onompembe abazange baphathe kuhle umdlalo wabo leqembu leMzansi Lakers. Ngaleso sikhathi, i-JBC ibilandela nge-18-9. IMzansi Lakers icine iphiwa lumdlalo ngenxa yokukhalala kweJBC.
Kukalutshwane ukuthi umdlalo we-basketball koBulawayo utshengisele ukungahloniphi imithetho yomdlalo.
Iqembu leJBC livela eHarare.
Ngokunjalo, abaqoqi bomncintiswano bafuna ukuthi okwenziwe yiJBC kungaphindwa.
Ekhuluma lentatheli unobhala jikelele weBBA uFrancis Dube uthe kumele kube lesijeziso.
“Sesiyibhalile incwadi esizayithumela inhlanganiso enkulu eyeBasketball Union of Zimbabwe ukuze sithole isixwayiso kuloludaba,” kutsho uDube, okubonakale ukuthi uthintekile ngalokhu okwenzakala emncintiswaneni.
“Okwenziwa ngabadlali beJBC kululaza umdlalo wethu. Akumelanga sikuvumele ngoba sekungenzeka ukuthi amanye amaqembu adelele kwelakusasa benze okufanayo.”
Kusenjalo, impumela yomncintiswano iveza ukuthi iqembu lamadoda eleMzansi Lakers yilo elabayintshantshu ngokunqoba iLegends nge 58-39.
