uMthunywa
Ricky Zililo
OWAYENGUMDLALI weqembu leHighlanders Football Club uPatrick “Mboma” Mpofu ubonga uthando losekelo aluthola kwababengabadlali beqembu leli, njengoba esesizwa ngcono.
UMpofu obeselesikhathi egula uthe ngaphandle kwamalunga emuli yakhe amphathisayo, uthola usekelo olukhulu kwayedlala labo ngesikhathi lesi.
NgoLwesibili kuyonale iviki ayedlala laye ibhola uJohannes Ngodzo obemele iThe Football Ambassadors uphelekezele uMpofu esibhedlela ukuze ayebonwa ngudokotela ukuthi uqhuba njani.
Johannes-Ngodzo
“Bekungekho lula kodwa ngithanda ukubonga wonke umuntu obengisekela kuze kufike lamuhla.
Abemuli yami, abangane, abadlali bebhola abangiphe isibindi sokuthi ngiqhubeke ngisilwa lomkhuhlane lo. Ngomusa kaNkulunkulu ngizasila,”nguMboma lowo.
Ngensuku zakhe, umdlali waphezulu lo wazakhela udumo kumdlalo iBosso eyayidibene leqembu leCaps United ngomnyaka ka2005 lapho ahlohla ibhola elasukumisa inkundla yonke eBarbourfields iBosso yanqoba nge 2-1 wahle waba yisithandwa sabalandeli beqembu leli.
Kubikwa abadlali benguqu laba bamncedisa ngokufuneka esibhedlela langokudla.
Impahla le iqhutshwe nguCastro Ndebele, Graham Ncube loZephaniah Ngodzo endlini kaMpofu eNtumbane ngeSonto.
Umzukulu kaMpofu uJosphat Sibanda uthe umalumakhe kusadingeka ukuba ayokwenziwa i-brain scan.
“Bakhona abantu abasizwileyo ngesikhathi sidinga uncedo abagoqela ayedlala labo kunye labangane bakhe. Okwakhathesi kulemithi okumele ayinathe, uTshisa (Johannes) ubuye wamthatha wamphelekezela esibhedlela. Silinde ukuthi senze i-brain scan kunye lokuthi kuhlolwe ezinye izitho zomzimba wakhe. Labo abafisa ukusinceda bengaxhumana lami ku 0780997757 kumbe kunombolo zikagogo ezithi 0774559333,” nguSibanda lowu.
UJohannes uthe: “Ungomunye wethu ngokunjalo sizaqhubeka sisiza lapho esenelisa khona njengabangane kanye labake badlala ndawonye.
“Konke lokhu kusekuthembeni ukuthi singabantu banye, uthando oluqhubeka ngitsho singasekho enkundleni zenguqu kumbe izikhathi sijabula.”
