Ethel Ncube
KULEQULA lababomama ababengabafundi beNemane, eTsholotsho ngaphansi kwenduna uGampu asebevule ibhizimusi lokupheka amasepa eMzansi ngenhloso yokuziphilisa.
Iqhula leli lilamalunga angu-9 agoqela uPatrick Moyo, Elkanah Ncube, Sikhumbuzile Dube, Slungile Nobuhle Makhwelintaba, Patience Sibanda, Nashel Sibanda, Thembelani Ncube, Sinyazile Sibanda loLisa Sibanda bonke laba bengabafundi abafunda eNemane.
UMthunywa uxhumane lomunye walaba uNobuhle Makhwelintaba obike ukuba basacathula kulelibhizimusi kodwa bazimisile ukuyaphambili ngalo.
“Siqale ukutshaya imali ngoNhlangula loNtulikazi ukuze siqale ukuvula ibhizimusi lethu.
“Sakhupha omunye wayafundela ukupheka isepa yokuwatsha impahla leyokugezisa imiganu kanye lokwenza amafutha okugcoba.
“Omunye wethu lo wathi esevela funda wabuya wasifundisa lathi siliqembu yikho ukuthi senelise ukusungula ibhizimusi lethu.
“Ibizo lekhampani yethu kuthiwa yiKlass 98 Grand detergents. Amaproducts ethu abhalwe ibizo lethu.
“Sithengisela eGoli lapho esikhona kanye laseTsholotsho lakho siyathumela abantu bathenge akufani lokuthi sihlale phezu kwezandla,” kubika uNobuhle.
Uqhubekele phambili eveza ukuba ibhizimusi labo lisakhasa.
“Ibhizimusi lethu lisacathula sidinga ukuxhaswa okuzwayo kodwa asibuyeli emuva siqhubeka sisiyaphambili njalo sikhangelele ukuba ibhizimusi lethu likhule ukuze sikhulise umnotho wethu.
“Abafuna amaproducts ethu siyathumela loba ngaphi asikhethi mango,” kuphetha uNobuhle.
