Ethel Ncube
BEHLULEKA lokuzibamba ababalisi besikolo seNatha Primary esiseTsholotsho nxa belandisa ngokuhlukuluzwa ngokocansi ngondofa esikolo lesi osekulenyanga ezimbili kusenzakala.
Kubikwa ababalisi laba kunye labantwababo kababuquthi ngitsho ubuthongo ebusuku nanko bayabizwa ngamagama abo andubana bahlangane lezinto lezi abangaziboniyo.
UMthunywa ubikelwe ukuthi omunye wababalisi uphathekile emzimbeni khathesi kubangelwa luhlupho lolu.
Intatheli ixhumane lesinye isakhamuzi, esilabantwana abafunda esikolo lesi ochaze ngobunzima ababalisi besifazana ababhekane labo.
“Sibuhlungu ngento eyenzakala kubabalisi bethu. Kabasahlalisekanga ngitsho esikolo. Ngikhuluma nje ababili bahambile asilathemba lokuba bazabuye babuye lapha.
“Bathi ebusuku baqala bazwe umsindo wabobabhemi kungathi bayagijimisana phandle ngemva kwalokho baqala ukuzwa bebizwa ngamabizo abo.
“Kungavele kwenzakale lokhu ekuseni bathi bevuka bayabe kungathi bebehlangana labesilisa kodwa omkabo kabahlali labo,” kuchasisa isakhamuzi lesi esingathandanga ukuqanjwa ngebizo.
“Abantwababo labo bayehluleka ukulala ebusuku, bayabe bekhala kuze kuse besethuka. Sebesehluleka lokufundisa abantwabethu.
“Ondofa laba bangavele bafike ezindlini zabo zokulala, bababiza ngamagama abo okuzalwa bahle bakwazi ukuthi isiqalile inkathazo.
“Ngikhuluma nje umphathisikolo ulele phansi, abantwana badobha ingqamu igejelwe phansi ilelembu elibomvu bayipha umphathi lo. Abantwana babuye babona enye ingqamu bayabika, ithe isilandwa bathola ingasekho lapho abayibone khona. Iziga zonke lezi zikhomba ukuthi kukhona okutshaya amanzi esikolo,” kubika isakhamuzi lesi.
Intatheli ixhumane lenduna yakule indawo uGampu obike ukuba sebembikele ngohlupho lolu.
“Indaba eyenzakala esikolo seNatha ihlukumeza ababalisi hatshi mbijana. Ababalisi besifazane bathi bavuka ekuseni kungathi bebelele lomuntu wesilisa. Sebengena esikhathini bengaqedi njalo abantwababo abalali ebusuku.
“Sizama ukuthi sihlale phansi kuzanywe ukukhuzwa izakhamizi zekele ukuthumela izinto zazo esikolo ngoba ababalisi bangabaleka ikusasa labantwabethu lizaphambaniseka,” kuphetha induna uGampu.
