uMthunywa
Ethel Ncube
BATHWELE amagabha avuzayo ababalisi besikolo esiseduze leNathisa eKezi ngenxa yabondofa asebelesikhathi bebahlukumeza ngokocansi.
Lokhu sokudale ukuthi izakhamizi kanye lababalisi zihlale phansi kuboniswana ngokungenziwa ngondofa laba.
Ekhuluma lentatheli uMnumzana Edwell Ndlovu oyisakhamuzi kulindawo uthe udaba lwabondofa ludaba olusegudwini esiqintini kodwa isimanga yikuthi kubikwa ondofa laba bahlukuluza ababalisi kuphela esikolo.
“Ondofa laba bakhathaza ababalisi bethu abayibo abasifundisela abantwana okwenza bacine bengabuquthi obhukaBhuka.
“Ababalisi baletha uhlupho lwabo ebadaleni bethi abasenelisi ukulala ebusuku ngoba bahlangana lobunzima bokuthi ekuseni bangavuka bavuka belezitshengiselo zokuba bayabe behlangane labesilisa.
“Omunye umbalisi wesilisa uthi yena ebusuku uthi elele ezwe kulento eceleni kwakhe emfuqayo kuze kuse ngenxa yalokhu kufuqwa acine esehluleka ukulala,” kubika uMnu Ndlovu.
Omunye wezakhamizi oxhumane loMthunywa uMnumzana Simion Sibanda uveze ukuba ondofa benza umathanda esikolo kungakho kumele kutholakale isixazululo masinyane.
“Ngendlela ababalisi abalandisa ngayo indubo ababhekane lazo ngabondofa uzwa ubazwela usizi.
Njengezakhamizi sihlale phansi abazali lababalisi sihlafuna udaba lwakhona ukuba senze njani ukuze isikolo sihlanzwe ababalisi bathole ubuthongo obuhle.
“Okwakhathesi sisaqoqa imali yokuthi sigadise ozasisiza siphinde simnakelele. Esikufunayo yikuthi bakhitshwe ondofa laba baphinde bachaze umnikazi wabo.
Intatheli ixhumane loProvincial Education Director weMatebeleland South uNkosazana Beatrice Manjere oveze ukuba lindaba ayikafiki kuye.
“Indaba le ayikafiki kimi, engxenye isendleleni kodwa lami ngizadingisisa ngizwe udaba lwakhona ukuthi luhamba njani,” kuphetha uNkszn Manjere.
