Silo Mehleli Dube
IZIKOLO phose zonke elizweni nxa zivulwa ekuqaleni komnyaka abazali bakhetha ikhomithi eyabe incedisana lababalisi ekuqhubeni inhlelo zesikolo.
Kuba lomgcinisihlalo lomsekeli wakhe kube lonobhala njalo lomgcinisikhwama, kwesinye isikhathi lamalunga ekhomithi amabili kumbe amathathu. Ngiyangizwe isikhathi esinengi nxa besakhankasela ukukhethwa bafunga bagomele bathi bazakwenza konke okufunwa ngabazali ingqobo kuthuthukisa isikolo.
Bathembisa kakhulu lokuthi indleko zesikolo aziyikukhwela kungabizwanga umhlangano kwavunyelwana. Nxa sebekhethiwe batshintsha umbala okwendlondlo etholakale ewatheni idinga amagenga kumbe amagundwane. Uthola inengi labo selisima lababalisi sebevuma loba yini, bangabona ukuthi kulexekana labazali abangaphangi bavume banxuswa emihlanganweni uzezwa kuthiwa abanye bakuvuma pho ungaguqula into evunywe ngabantu abanengi uyabe usudinga ukuxabana labo.
Kwesinye isikhathi kuze bakhwitshizelwe emntwaneni wakho. Kubalulekile ukuthi nxa lingabazali likhetha ikhomithi elizafuna ukusebenza layo ngalowo mnyaka likhethe abantu abangani bayabona ezingwalweni, lingakhethi muntu ngoba elomhlambi, yikho okucina bencindezelwa ngababalisi becine besayiniswa lemali abangazaziyo kuthi nxa sekudubuka uthole ukuthi umgcinisihlalo kumbe umsekeli wakhe usayinile engazi lokuthi imali yakhona iyasebenzani.
Ngikhumbula omunye utshalimani kwesinye isikolo basebekhweza i-school fees bobabili lomphathi bethi bavunyelwe nguHulumende, bathe sebebotshwa kwaficakala ukuthi umphathi wayelegunya lokuthi utshalimani wayengaboni lutho kunombolo, okwakhe kuyikusayina wabotshwa waya ejele.
Ayixabene.
