uMthunywa
Bongani Ndlovu
ABALIMI bakhuthazwa ukuthi balime umhlobo wekhabitshi othiwa yi-red cabbage ngoba ilenzuzo njalo iyancedisa ukulwisa imikhuhlane ehlasela ezinye izilimo.
UMnumzana Mike Mlilo ongumlimi koBulawayo uthe umhlobo lo wekhabitshi nxa umlimi engawulima kuhle njalo ngesikhathi sawo angaphumelela.
“Inengi labalimi livame ukulima ikhabitshi le eluhlaza, ngoba iyadlisa kodwa abalimi into abangayinanzeleliyo yikuthi akusi-green cabbage yodwa edlisayo, le-red cabbage layo ilemali,” kutsho uMnu Mlilo.
“I-red cabbage ivuma kakhulu ngesikhathi somqando, lanxa yona ilakho ukulinywa yiloba ngasiphi isikhathi somnyaka kusiya ngomhlobo owulimileyo, kodwa ke i-red cabbage ifuna ngesikhathi somqando,” kuchaza uMnu Mlilo.
UMnu Mlilo uqhubekele phambili wathi okuqakathekileyo yikuthi anakekele ikhabitshi yakhe ngendlela eqondileyo.
“Impande ze-red cabbage zifa lula ngakho kumele umlimi abone ukuthi uyayihlakulela ikhabitshi yakhe njalo akhiphe amahlamvu asetshintsha umbala esiba lithanga,” kuqhuba uMnu Mlilo.
UMnu Mlilo ugcizelele wathi i-red cabbage ihamba phambili ekulwiseni imikhuhlane.
“Inengi labalimi alijayelanga ukulima i-red cabbage ikanti iyanceda kakhulu ekuvikeleni umkhuhlane wemvukuzane.
“I-red cabbage yiyo ikhabitshi ehlabusayo kuma-salads la anjenge coleslaw, iyadliwa loba iphekiwe njalo yenza lesivande somlimi sibukeke ngobucwazicwazi bayo,” kutsho uMnu Ncube.
UMnu Mlilo ukhuthaze abalimi ukuthi nxa behlanyela imibhida yabo enjengale bahlanyele intanga ezihloliweyo njalo ezingakonakali ngokuhlala kakhulu.
“Abalimi kabathenge intanga zabo ezitolo ezithengisa intanga ezihloliweyo njalo ezilencwadi zikaHulumende ukuze izilimo zabo kube ngezilohlonzi, hatshi lezi esezonakele,” kuphetha uMnu Mlilo.
