uMthunywa
YiNtatheli kaMthunywa
KULISIZINI balutshwane abantu ababukele imidlalo yenguqu kuligi yeCastle Lager, okusuke kwayangisa amaqembu lenhlanganiso yePremier Soccer League (PSL).
Abalandeli bathi imidlalo ayikhwabithisi njalo iyadula.
Ngenxa yezikhalazo lezi, abaqoqi benkezo yeChibuku Super bakubone kufanele ukuthi behlise intengo yokungena enkundleni mhla kudibana iBulawayo Chiefs leHerentals.
Imali
Abathandi bomdlalo bazakhipha kusukela ku-US$1 kuphela ukubukela umdlalo eBarbourfields.
Lesi yisiqalo kumbali yalinkezo kuminyaka edluleyo. Ababukeli besebejwayele ukuthi babhadale iUS$3 kusiya phezulu.
Kukhangelelwe ukuthi abalandeli bomdlalo koBulawayo bangene ngobunengi babo ukuze kugcwaliswe inkundla. Zombili ezingqikilana ngeSonto zibanga inkezo yeChibuku kuyaziwa ukuthi zilabasekeli abalutshwane.
Ukwehliswa kwemali yokubukela lokhu kuzindaba ezinhle kumaqembu la azakhangelela ukuthi abukelwe ngabasekeli bamanye amaqembu.
Abalandeli beBosso enkundleni yeBarbourfields koBulawayo
IBulawayo Chiefs yiyo enikezwe ithuba lokuthi inxuse abalandeli bamaqembu abalisa ikakhulu aweHighlanders.
KwabePSL, ukwehlisa intengo yomdlalo yikusondeza umdlalo ebantwini.
“Wonke umuntu othanda umdlalo wenguqu unxusiwe kulumdlalo wenkezo yeChibuku Super enkundleni yeBarbourfields ngeSonto,” kubika isikhulumi sePSL uKudzai Bare ngoLwesithathu.
Chibuku-Super-Cup
“Le yindlela yethu yokubonga abasekeli bomdlalo lokubakhuthaza ukuthi bakhwabithe umdlalo wabo.”
Intshantshu yalumdlalo izadibana lentshantshu yeCastle Lager ngoZibandlela kunkezo ebizwa ngokuthi yiCastle Challenge.
