Ziyavuthwa inkundla ku-basketball

Ziyavuthwa inkundla ku-basketball

0 69

YiNtatheli kaMthunywa
AMAQEMBU omdlalo we-basketball koBulawayo asephendukile enkundleni ngemva kokuqhutshwa kwemidlalo ehlanganise amaqembu aphuma kumazwe amane kumincintiswano yeZone 6 ngeviki edluleyo.
Imidlalo yama-Zone 6 le ebiqoqwe yinhlanganiso yeFederation of International Basketball Associations ibisenkundleni yeTrade Fair lapho okwanqoba khona iqembu leAngola iPremiera Augosto.

Okwakhathesi amaqembu ancintisa ekuligi yeBulawayo Basketball Association asedumisa inkundla nanko phela umkhankaso wesizini yalonyaka usuqalisile, loba kungela sekelo lwemali.

Sekudlalwe amaviki amabili njalo intshantshu yanyakenye iLakers isibike ukuba izakuphinda eyakwenza kuleyo sizini ngokubhuqa zonke.

I-Lakers ingena ivula isizini iphezulu kwamalungiselelo wokumela isizwe kumncintiswano weAfrica Cup. Kumdlalo waleliqembu ngempelaviki, iLakers inqobe iqembu layo labasakhulayo nge 79-49.

Amathimu ayehlupha ngomnyaka odluleyo iMarvericks leHighlanders asehambela phambili ngemiklomelo, okuveza ukuba akhangelele ukuhluthuna inkezo.

Zombili zitshayelele phansi iqembu lenyuvesi yeNust kumidlalo eqhutshelwe enkundleni yeKhanyisile koNtuthu ngoMgqibelo. IHighlanders inqobe iNust A nge-74-20.

Abadlali benyuvesi baqede umdlalo bephefuzela, okube yisitshengiselo sokuthi abazange balolonge ngemfanelo ngesikhathi sekhefu. IMarvericks idlule phezulu kwe-Nust B nge-61-37.

Umdlali weHighlanders uSibongile Mnkandla uphethe engumdlali ophosele amabhola amanengi ngokuthola imiklomelo elitshumi lane.

Omunye umdlali weLupane State University uVusumuzi Moyo usebenzise ubude bakhe wajikela ebhasikitini. amabhola amnikeze imiklomelo elitshumi lambili.

ILupane State University idle iOstritch 56-44.

Ukuqhutshwa kwemidlalo le kuza ngesikhathi inhlanganiso yeBulawayo Basketball Association ikhalaza ngokuswela imali yokusekela imidlalo yayo.

Ekuqaleni kwalonyaka inkokheli zalumdlalo koBulawayo zabika ukuba ziqoqa ukuhlanganisa iligi yazo lamanye amadolobho aseduzane ukuze kubelula ukusondeza amankampani angakhwabitha ukusekela.

SIMILAR ARTICLES

NO COMMENTS

Leave a Reply