uMthunywa
Nomthandazo Ndlovu
ABALIMI bakhuthazwa ukuthi balime izihlahlakazana eziyimuthi (herb plants) njalo ezelaphayo ngoba ziluncedo ebantwini kukanti futhi zilenzuzo.
Ekhuluma loMthunywa uMnumzana Tapiwa Moyo uthe ukulima izihlahlakazana lezi okuthiwa ngama-herbs kuqakathekile kakhulu ngoba ziyancedisa endaweni ezitshiyeneyo.
“Ukuba lesivande sezihlahlakazana lezi ezenza imithi kuyadlisa ngoba inyanga ezinengi zesintu ziyazisebenzisa ekwelapheni,” kutsho uMnu Moyo.
“Izihlahlakazana ezinjenge-Moringa le Aloe Vera zilusizo kakhulu emikhuhlaneni eminengi, ikakhulu kulabo abaphila legcikwane lengculazi imithi eyenziwe ngezihlahla lezi iyancedisa amasotsha omzimba ukulwisana lemikhuhlane,” kuqhuba uMnu Moyo.
UMnu Moyo uqhubekele phambili wathi kuqakathekile ukuthi abantu bahlanyele izihlahla ezilusizo kuzulu hatshi ukumane bahlanyele ingqe yisiphi isihlahla.
“Kuqakathekile ukuthi abalimi balime izihlahla eziyimithi, nxa umlimi elesivande sakhe sezihlahla lezi ngesiLungu esiyibiza ngokuthi yi-herb garden ulakho ukuthola inzuzo emangalisayo ngoba wonke umuntu uyabe esewoda kuye ngoba izihlahla lezi ziyabe zisese-fresh,” kuchaza uMnu Moyo.
“Abanye ngabasebenzisa i-garlic le-ginger ekuphekeni into ezinjengenkukhu, indawo ezinjengamahotela ziyayifuna imithi le eyenziwe ngezihlahla lezi ukuze ukudla kwabo kuhlabuse nxa sokuvuvuzelwe imithikazana le (spices). Ngakho umlimi nxa ele-herb garden uthola inzuzo ethe xaxa sibili ngoba inengi labantu liyazifuna izihlahla lezi kodwa lizithola sezomile emakethe,” kutsho uMnu Moyo.
Omunye umlimi uNkosazana Priscilla Mwende uthe izihlahla lezi zilenzuzo nxa umlimi evele elomkambo lapho athengisela khona.
“Izihlahla lezi eziyimithi ziyadlisa sibili, mina esivandeni sami ngilima izihlahla ezigoqela uMoringa, Valerian, Southern Wood kanye lezinye ezingumuthi omkhulu esezingathengiswa langaphandle kwelizwe,” kutsho uNkszn Mwende.
“Ama-herb plants kahluphi ngitsho ukuhlanyela lendlini umuntu sengawahlanyela ngoba kadingi langa elinengi, lomvundiso nje umlimi umane afake nje olingeneyo,” kuphetha uNkszn Mwende.
