Zilubhekise eBots eze-basketball

Zilubhekise eBots eze-basketball

0 120

Nkosilathi Sibanda

IQEMBU lomdlalo we-basketball kuleli kubikwa lizakuyancintisa kwele-Botswana kumqhudelwano wohlelo lwe “3 on 3”  oludibanisa amazwe ayisitshiya galolunye.

Umhlobo lo we-basketball usanda kuvunyelwa ukuthi uncintiselwe enkundleni ezinkulu kuma-Olympics.

Isizwe seZimbabwe loba singakaqini okuzwayo kulumdlalo, sizimisele ukuthi sithumele abadlali kweleBotswana ngempelaviki kumidlalo ebizwa ngokuthi yiYoung Lions Cup Championships.

Ekhuluma loMthunywa kuliviki uJoe Mujuru uMkhokheli weBasketball Union of Zimbabwe (BUZ) uthe bathumele iqembu belenjongo yokuthi baphenduke lemendulo yegolide.

IZimbabwe isincintisa okwesibili kulumqhudelwano.

“Sihlose ukuphenduka siphethe igolide ngemva kokunqoba ngomnyaka odluleyo,” kutsho uMujuru.

UMujuru uthe uhlobo lwe “3 on 3” ku-basketball loba lungakabi lodumo kuleli, bakhangelele ukuthi balukhankase lusabalale lasezikolo.

Umgcinisihlalo lo uthe uthanda ukubonga usekelo abaluthola koBulawayo ngesikhathi ilizwe liqoqa imidlalo yama-Zone 6 eyayingaphansi kwenhlanganiso yeFederation of International Basketball Associations ebisenkundleni yeTrade Fair lapho okwanqoba khona iqembu leAngola iPremiera Augosto.

Ukuqhutshwa kwemidlalo le kweza ngesikhathi inhlanganiso yeBulawayo Basketball Association ikhalaza ngokuswela imali yokusekela imidlalo yayo.

Ekuqaleni komnyaka odluleyo inkokheli zalumdlalo koBulawayo zabika ukuba zizahlanganisa iligi yazo lamanye amadolobho aseduzane ukuze kubelula ukusondeza amankampani angakhwabitha ukusekela.

SIMILAR ARTICLES

NO COMMENTS

Leave a Reply