uMthunywa
YiNtatheli kaMthunywa
UMDLALO kanobhutshuzwayo owabadlali abahlanu uzathi ukuvuthisa inkundla yelokitshi leGwabalanda lapho amaqembu amabili atshisileyo kulisizini azadlalela inkezo yokugqitshwa komnyaka ngempelaviki.
Kubikwa iqembu leKilmanock lizangqikilana lamaBhubesi enkundleni ebizwa ngokuthi yiGrassroots Football for Hope Centre.
Abaqoqi balumdlalo babike ukuba bafisa ukuthi abathandi benguqu koBulawayo baze ngobunengi babo ukuzokholisa ukudla kwamehlo. Bathe njengoba isizini yenguqu isiphelile, kuliqhinga elihle ukuthi wonke umuntu aqonde eGwabalanda ukuyabukela iFive-A-Side.
Umdlalo lo awuladumo olumangalisayo kodwa kulandela ukukhankasa okwenziwa nguPhilani Banda umgcinisihlalo walumdlalo kulumhlubulo ongezansi yelizwe, iFive-A-Side isithola abasekeli kubadlali lababukeli.
UBanda uxoxe kabanzi ngokuqoqwa kwenkezo edlalelwa yiKilmanock lamaBhubesi wabika ukuba sebeqoqe baphelela ukunxusa amaqembu labathandi bomdlalo.
“Inkezo le iyisibonelo sokuba imidlalo yethu yeligi iqhube kuhle. Umncintiswano usuncomeka ngoba amaqembu adlala ibhola elimnandi. Sizabukela umdlalo ohlabusayo kunkezo yokuvala umnyaka,” kutsho uBanda.
UBanda uthe ngemva komdlalo kuzaqhutshwa umkhosi wokubonga abadlali lamaqembu ngemivuzo.
Ukuze ifinyelele umdlalo we-final, iKilmanock yatshaya iFox nge 7-2. Komunye umdlalo obukhona ngeSonto edluleyo, Amabhubesi anqobe iFlying Stars 6-4.
UBanda ucebise amaqembu asemhlubulweni ongezansi yelizwe ukuthi adlale iFive-A-Side.
“Inguqu yabadlali abahlanu ifana xathu lomdlalo lo olabadlali abalitshumi lanye. Sikhuthaza abadlali ukuthi babumbe amaqembu azadlala ukuze iFive-A-Side ikhule.”
Kwezinye indawo inguqu yeFive-A-Side idlalelwa enkundleni elophahla njalo isebenzisa inkundla encinyane kulaleyo eyenguqu yabadlali abanengi.
