uMthunywa
YiNtatheli kaMthunywa
KULANDELA ukutholakala kwenyoka, amalembu, ukhomane kanye lemithi okucatshangelwa ukuthi kungabe kusetshenziswa kubuthakathi phambi kwenye indlu eselokitshini leNew Lobengula koBulawayo ngoLwesihlanu kuviki ephelileyo, sekuzwakale ihungahunga lokuthi lezo nyoka kwakungesinyoka kodwa ngabantu.
Iphephandaba likazulu lizwe udletshana lokuba uNkosazana Miriam Ndlovu, onguye umninindlu walapho okwatholakala khona inyoka lezi uthe watshaya inyoka lezo ngophini ngoba ekholwa ukuthi kwakungasinyoka kodwa kungabantu ababeze endlini yakhe ngenjongo yokuganga. Kucatshangelwa ukuthi labobantu bakhulelwa yisiqina kwalowo muzi yikho ‘baphenduka baba zinyoka’.
UMthunywa uvakatshele kulelilokitshi waxoxa lezakhamizi ezazikhona mhla lezo nyoka zibonakala zaveza ukuba inyoka lezo zazingenzi njengenyoka zeganga ngoba indlela ezazithambe ngayo yayisolisa mhlawumbe yikho uNkkz Ndlovu wenelisa ukuzibulala ngokuzitshaya ngophini.
“Selokhu ngathwetshulwa yingwe kangikaze ngizibone inyoka ezinjeya, lami ngiyakholwa sibili ukuthi kwakungayisizo nyoka. Indlela ezazisenza ngayo iloba ngubani wayebona ukuthi kukhona okutshaya amanzi.
“Inyoka thina sikhula zazitshaywa ngengodo ezinde, lakho utshaya ukhatshana. Lezi ezitshaywa ngophini zife ngiyaqala ukuzibona njalo lokhu ngitshe amathe,” kutsho uSambulo Nyathi.
Kusenjalo abanye ababekhona ngesikhathi kusenzakala izigigaba zonke lezo babikele uMthunywa ukuthi okwenza bacabangele ukuthi uNkkz Ndlovu angabe wayeqinisile nxa wayethi kayisizo nyoka yikuthi wayezitshaya ekhuluma lazo sengathi ukhuluma labantu.
“Mina ngazibonela ngawami umama lowana indlela atshaya ngazo inyoka leziyana. Kambe kulomuntu ongatshaya inyoka ezikhuza njengabantu. Thina samuzwa esithi enyokeni, ‘ngalitshela kudala ukuthi yekelani ukuzagangela endlini yami’.
“Okunye okwasimangalisayo yikuthi kambe isibindi sokuthukulula iqhele elalibophe enye yezinyoka lezo wasithatha ngaphi engumuntu ongumama,” kutsho elinye inina eliziqambe ngokuthi nguMaDube nje kuphela.
Kubikwa abazalwane bamabandla e-ZCC kanye leRevelation Church of Christ labo bagcizelela ukuthi lezo nyoka zazingeyisinyoka kodwa kwakungabantu.
UMthunywa uphuthume wayafika eLobengula lapho axoxisane khona kabanzi loNkkz Ndlovu mayelana lesiga lesi.
UNkkz Ndlovu uveze ukumangala ngamahungahunga asekhulunywa ngabantu mayelana lenyoka lezo.
UNkkz Ndlovu ubike ukuthi ucabangela ukuthi izinto lezo zingabe zatshiywa egedini lakhe emadabukakusa angoLwesihlanu lapho abona khona izibane zemota zikhanyisa endlini yakhe ngehola lesibili anduba kwehle abantu abathathu, amadoda amabili kanye lomama oyedwa.
“Kwakungo-2 ebusuku lapho engabona imota ikhanyisa egedini, kwehla abantu abathathu. Angizange ngicabangele okunengi mina kodwa ngamane ngazitshela ukuthi ngabantwana nje ababefika lekombi yalapha ekhaya ngakho angizange ngibelendaba labo ngaqhubekela ngazilalela.
“Ekuvukeni kwami ke ekuseni ngisiyathanyela phandle, yikho lapho engahlangana khona lemhlola le ngasengibiza omakhelwane ukuthi bazengibonisa anduba ngiyebikela lamapholisa enkambeni yeMagwegwe.
“Ngilapha lokhu ngilesithuli ngoba lami angazi ukuthi isiga lesi singabe sisitshoni ngoba mina lokhu ngangena khonapha endlini yami angikaze ngiphoxane lomuntu. Ngingumama ohambela phezulu kakhulu ezintweni zonke ngoba ngingumama webhatshi,” kulandisa uNkkz Ndlovu.
UNkkz Ndlovu uqhubeke wathi kungenzeka ukuthi lezonyoka zatshiywa ngumuntu owayezama ukumlinga kumbe ukumethusela ngakho esinye isalukazi seMalawi samlayela ukuthi kathathe uphini atshaye ngalo inyoka lezo.
Uqhubekele phambili wathi uphini lolo ulugcinile ukuze ahambe lalo kubazali bakhe eBeitbrigde.
Ebuzwa ngamahungahunga okuthi inyoka lezi zazingesinyoka kodwa abantu, uNkkz Ndlovu uveze ukuthi laye usemnyameni.
“Ngeke ngithi inyoka leziyana ngabantu. Lokho lami ngikuzwa ngabantu asebefika khonapha ekhaya besithi inyoka leziyana ngabantu. Labanye abantu bama-church bake bangitshela into enjalo kodwa mina ngeke ngithi ngabantu njengoba inyoka lezo zathathwa ngabeParks kanti abanye abantu bathi zinyoka zeChipangali kukanti abanye bathi zazifafazwe nge-spray ukuthi zibe yizithutha,” nguNkkz Ndlovu lowo.
Uqhubekele phambili wathi lanxa yena engumama olikholwa umuzi wakhe wawuqinisa lanxa engasathandanga ukwaba imfihlo yakhe mayelana lokuqinisa umuzi wakhe.
