Yisiphithiphithi ngokuvalwa kwamanzi

Yisiphithiphithi ngokuvalwa kwamanzi

0 114

Ethel Ncube
IZAKHAMIZI zakoBulawayo zikhathazekile ngendlela ezivalelwa ngayo amanzi yikhansili yakoBulawayo nanko phela kayilandeli uhlelo eyalubekayo lokuvala amanzi.

Kusukela ngeviki ephelileyo ikhansili yakoBulawayo iqale ukuvala amanzi ngenhloso yokulondoloza amanzi asemadamu asesigabeni seMzingwane.

Uhlupho lokuswelakala kwamanzi edolobheni leli sekudale ukuba abantu bacine benatha amanzi ezibholane angahlanzekanga.

UMthunywa ukhulumisane lesinye isakhamuzi esihlala elokitshini leLobengula West uMnumzana Thokozani Mlilo oveze ukuba ikhansili kayilandeli uhlelo eyalubumbayo lokuvala amanzi.

“Sesidubekile ngamanzi, kuhlelo olwakhitshwa yikhansili ngempelaviki amanzi akumelanga ahambe kodwa ngamangala sengibona ngeSonto engekho kukanti kwakumele ahambe ngoLwesithathu.

“Ukuhamba kwamanzi ngendlela le engahlelekanga kucina kusithwalisa nzima kakhulu. Amanzi ayimpilo njalo ukuwaswela kungadala ukuba kucine kuqhamuka imikhuhlane efana labo-cholera,” kulandisa uMnu Mlilo.

Uqhubekele phambili esithi ukuvalwa kwamanzi kuyingozi kakhulu ezikolo.

“Ezikolo yikho lapho okulodubo oluphindiweyo ngoba abantwana bayabe bebanengi kodwa kungelamanzi, lokhu kuzacina kudala imikhuhlane. Ikhansili kumele iphathise izikolo ngama-bowser amanzi ngoba nxa kungasabanga njalo kuzakuba nzima,” kubika uMnu Mlilo.

Ekhuluma lentatheli uNkosazana Melody Ndlovu uveze ukuthi amanzi aseludubo, njalo abasakwazi ukuthi asehamba nini abuye nini.

“Ukuhamba kwamanzi mahlayana sekusithwalise nzima njalo lokubuya kwawo akuqedakali ngitsho. Uhlelo lwakhona kalulandelwa okwenza sibe phakathi kwetshe lembokodo ngoba amanzi ezikotsho awanatheki.

“Ngempelaviki sasisithi silamanzi ngithe ngisiya empopini ekuseni ngathola qha ngapha ngingakhelelanga, isambuzi sifuna amanzi. Kumbiko engawubona kunkundla zokuxhumana angikubonanga ukuthi ngoMgqibelo kumbe ngeSonto sizaswela amanzi.

“Ikhansili kayazise abantu ngesikhathi nxa kukhona okuzaguquka kumele babone ukuthi bayasazisa kumarediyo hatshi ukuthi sibone impompi sezingaselatho. Kuyadingakala ukuthi lamabhawuza abuye futhi ukuze singanathi amanzi alengcekeza,” kubika uNkszn Ndlovu.

Iphephandaba likazulu lixhumane lesikhulumi sekhansili yakoBulawayo uNkosikazi Nesisa Mpofu oveze ukuba sekulolunye uhlelo lokuvala amanzi.

“Sekulenhlelo ezimbili ngeviki ezokuvala amanzi ezaphumayo ezamahola angu-24 lolu lona ngolwangempelaviki. Kube lolunye olwamahola angu-48.

“Siyaxwayisa abantu ukuba babilise amanzi abawakha ezibholaneni asibakhuthazi ukuthi bawanathe enjalo,” kubika uNkkz Mpofu.

Kubikwa ngoMgqibelo kuhlelo lokuvalwa kwamanzi kwamahola angu-24 amanzi azavalwa emalokitshini abalisa iNkulumane, Nketa, Sizinda, Tshabalala, Bellevue, Newton West, West Sommerton. Amanzi ayabe evalwa ngehola lika- 0730 ekuseni aze avulwe ngeSonto 0730.

Kukanti eMganwini, Pumula, Nketa 9, Cowdray Park, Emakhandeni, Gwabalanda, Maplanka, Luveve, Magwegwe, Njube, Entumbane, Mpopoma, Lobengula, Mabutweni, Iminyela, Pelandaba, Matshobane avalwa ngeSonto ngehola lika-0730 avulwe ngoMvulo 0730 ekuseni.

Kukanti kuhlelo lwamahola angu-48 eBarbourfields, Mzilikazi, Nguboyenja, Makhokhoba, Hillside South, South Riding, Fourwinds, Hillside, Northend, Tegela, Romney Park, Paddonhurst, Sunnyside, Morningside, Rowena, Montrose, Southworld, Greenhill, Barham Green, Kennilworth, Ilanda, Burnside azavalwa ngoMvulo 0730 avulwe ngoLwesithathu ekuseni.

NO COMMENTS

Leave a Reply