uMthunywa
LESI yisigaba sokucina somnyaka okumele abafundi beviyo lesine lelesithupha kumfundo ephezulu basebenze gadalala ukuze baphumelele emhlolisweni yabo balandele abanye asebephambili. Yinto enhle ukuphumelela ezifundweni. Nxa usasalele emuva kwezinye izifundo bona ukuthi ubamba ziqine sibili.
Uma ukula amaviyo aqanjwe lapha usuzazi ingxenye ongazizwisisiyo ngakho-ke zifundisise ukuze uphumelele emhlolisweni yakho yonke.
Okwamaviki athile sizake siphinde umphehlo kwezinye ingxenye zohlelo ezijayele ukuphica abafundi.
Sizaqala kubizo. Sekungcono kuliminyaka ngoba abafundi sebelufunda kusukela kuviyo lokuqala kumfundo ephezulu uhlelo. Abafundi sebefika kuviyo lesithathu sokwazi ukuthi liyini ibizo kulaphambilini lapho abafundi ababeqala ukuzwa ngokuhlela amabala kuviyo leSithathu bafike kuviyo leSine bengakalubambisisi uhlelo.
Ukuze abafundi benze kuhle kumhloliso wohlelo lwesiNdebele emhlolisweni kumele bazifunde zonke ingxenye zohlelo.Yini uSobizo? Usobizo ligama elitsho ibizo kumbe isabizwana. Ngamanye amazwi litsho lawo amagama angumenzi kumbe umenziwa emitshweni.
(a) Inkabi zidonsa ikhuba. Inkabi libizo kulo umutsho.
(b) Bona babuye izolo. /Bona/ yisabizwana. Umfana lo uhlala lapha. Lo yisabizwana. Bafunda bonke kulesi sikolo. Bonke yisabizwana.
Yini ibizo? Ibizo ligama lento esingayibona ngamehlo siyibambe ngesandla loba esingeke siyibone kumbe siyibambe kodwa esaziyo ukuba ikhona. Izibonelo: ugwalo, umoya, uLangelihle, uthando, ibhola, uTshatshane, izifo, abantu.
Sizaqala ngesakhiwo sebizo kuviki ezayo.
