uMthunywa
Gladmore Ncube
ZIDIDENE izakhamizi zesigabeni seNsuza ngemva kokuba eyinye indoda yakule indawo engutsikamutanda ibikele umakhelwane wayo ukuthi yiyo eyabulala umntanakhe.
Isiga lesi esihlasimulisa umzimba senzakale kuviki ephelileyo lapho uMnumzana Mbizazimanzi Nyoni abikele khona uMnumzana Spencer Ndlovu ukuthi nguye owabulala umntanakhe elabangane bakhe ngokumgalulisa emfuleni uMbembeswana ngesikhathi evela esikolo.
Kuzwakale ukuthi uNyoni uveze lokhu ngemva kokuba abaphurofethi benze umlindelo emzini kaNdlovu bamtshela ukuthi nguye owabulala umntwana lo yena wakwala lokhu.
Kuzwakale ukuthi uNyoni waveza ukuthi nxa engangena endlini uyabona umntakaNdlovu emile.
UMthunywa ukhulumisane loMnu Ndlovu onguyise kamuyi walandisa ngokufa komntanakhe kanye langezehlakalo langamanyathela awathatha ngemva kwalokho.
“Ngathi ngiseSouth Africa ngezwa umkami esithi umntanami ugalule evela esikolo eBambanani Primary. Lokhu kwangidanisa kakhulu ngabuya ekhaya kwathi ngemva komngcwabo ngasuka ngayadinga abaphurofethi eTsholotsho. Ngathi ngiphenduka ngezwa kuthiwa uNyoni ufike kubaba wathi ufuna ukulungisa ukuze umuntu owabulala umntanami avele.
“Ngemva kwalokho abaphurofethi babuya benza umlindelo okuyikho abaveza khona ukuthi umntanmi wabulawa nguNyoni labangane bakhe. Sathi simbuza wayala kodwa isimanga yikuthi endlini yakhe abaphurofethi bakhipha ijesi yomntanami ayeyigqokile mhla egalula,” kulandisa uMnu Ndlovu.
UNdlovu uqhubekele phambili wathi ngemva komlindelo uMbizazimanzi wabuya wazobikela abazali bakhe ukuthi nguye owabulala umntanami usemhlupha.
“Into engimangalisayo yikuthi kwathi ngemva komlindelo uMbizazimanzi wabuya wazobikela abazali bami ukuthi nguye owabulala umntanami. Wathi wamtshayisa ngondofa elabangane bakhe ngakho uyaxolisa ngoba usemhlupha kakhulu.
“Ngokunjalo mina kangikwazi ukuthi umhlupha njani kodwa ngizwa ubuhlungu kakhulu ngendaba le njalo ngeke ngimxolele,” kutsho uMnu Ndlovu.
Ebuzwa ngale indaba usobhuku wakule indawo uMnumzana Colbert Mbambo uvumile ukuthi uyayazi wathi kalankani ngayo.
“Kuliqiniso sibili ukuthi kulotsikamutanda owazivezayo ukuthi nguye owabulala umntakaNdlovu ngakho lami kangilankani ngendaba le ngoba kangikaze ngikuzwe okunje,” kuchaza uSobhuku uMnu Mbambo.
Imizamo yokukhulumisana loMnu Nyoni yehlule ngoba ucingo lwakhe lalile ukungena.
