uMthunywa
Musa Janga
UMCULI olodumo koBulawayo owazakala ngomculo we-Afro Jazz uJeys Marabini useveze ukuthokoza ngendlela idlalade lakhe lesitshiyagalolunye elamukelwe ngayo ngumphakathi.
Idlalade leli elilesihloko esithi “Intunjambili” ulihwatshwe kunyanga edlulileyo njalo usethengise amaCD edlula amakhulu ayisikhombisa koBulawayo nje kuphela.
UMthunywa ukhulumisane loJeys Marabini oveze injabulo enkulu kakhulu ngokuphumelela kwedlalade lakhe ethi abantu bayalithakazelela okwamagama.
“Liyabahlanyisa abantu idlalade lami, lokhu kuvele sobala kumcimbi wabantu owenziwe ngoMgqibelo. Ngathi ngingena esitikini abantu bajabula kakhulu,” kuchaza uMarabini.
Uqhubekele phambili esithi ama-CD edlalade leli uwathengisela endaweni ezitshiyeneyo.
“AmaCD atholakala endaweni ezehlukeneyo ezinjengeGwanda, Harare, khonapha koBulawayo kanye lakweleSouth Africa. Ingoma zami zitshaywa kakhulu emsakazweni egoqela iStar FM le Zi-FM.
“Okunye njalo okwakhathesi sengithengise amaCD angaba ngamakhulu ayisikhombisa ngingabali lawo engawasa kwezinye indawo ngoba ngingakalandeleli ukuthi selithengwe njani kodwa ngilethemba lokuthi lakhona liyathengwa,” kutsho uMarabini.
UMarabini uphethe ngokubonga abantu bakoBulawayo kanye labalandeli bakhe kundawo zonke ngosekelo langothando abamtshengise lona kumculo wakhe.
“Ngibonga kakhulu abantu bakoBulawayo kanye labalandeli bami, kuthiwa umuntu ngumuntu ngabantu ngakho kungayisibo ngabe kangizange ngiphumelele,” kuphetha uMarabini.
