Yikudla kwendlebe kodwa kuLuba Lemvelo

26 Nov, 2015 - 00:11 0 Views
Yikudla kwendlebe kodwa kuLuba Lemvelo ILuba Lemvelo

uMthunywa

MTHWAKAZI omuhle njengoba kuthiwa jabula mphimbo ngoba uzaginya, khathesi sithi jabula ndlebe ngoba uzakuzwa. Nanku kugcwaliseka ngephephandaba likazulu elidume ngezimnandi. Lamuhla liliphathele iLuba Lemvelo ingcitshi kwezomculo lemigido yesintu. Leliluba liphethe ingcwalaguma zodwa, zigida kunyikinyeke phansi.


Bakwethu indaba yotshelo kayinonisi njalo ukutshelwa yikuncitshwa, woza lendlebe ngiza lendaba, thapha nantu uluju lwengxoxo phakathi kwentatheli yephephandaba likaZulu uCornelius Luphahla (CL) loMlawuli waleliqembu lamavithikazi uNkosazana Muchaneta Dube (MD).

CL: Akuthi fahla fahla ngembali yakho leyeqembu lakho ukuthi laqala nini ukuhlabela ntombendala.

MD: Mina ngake ngahlala eSanyathi eKadoma ngabuya njalo ngahlala elokitshini leNjube kodwa ngakithi kusePlumtree. Ngakho-ke ukuhlabela ngangivele ngikuthanda ngaze ngangena kuqembu leThandanani kwathi ngo 2012 saphuma sababane. Yikho-ke kwathi ngo 2013 sasesisungula iqembu leLuba Lemvelo khathesi silamaluna angu 13.

CL: Umphakathi uthanda ukwazi ukuthi leliqembu lalisungula ngenhloso bani?

MD: Ekusunguleni kwethu leliqembu sasijonge ukujabulisa abantu sibuye njalo silondoloze amasiko esintu ngoba kungathi setshabalala. Lokhu sakwenza ngokuhlabela ingoma zesintu sibuye sigide imigido yesintu egoqela isitshikitsha somendiso, esomekezo, kanye layo yonke imihlobo yemigido yesintu. Lapho-ke sibizwa sisabela.

CL: Tshela abantu vithikazi elikhulu ukuthi landise ukutshayela ngaphi ingoma zenu njalo selake lakhipha idlalade na?

MD: Njengabaculi besintu thina sandise ukumenywa endaweni ezigoqela imitshado, amadili ukuzalwa, kanye lakweminye imidlalo etshiyeneyo. Emadilini okuzalwa ikakhulu awabantu abadala njengabogogo sandise ukumenywa ngoba abadala bathanda ezesintu.

Okwakhathesi asikakhiphi idlalade kodwa siyake sihlabele lomhlabeleli kamasikandi uZinja Ziyamluma. Yikho-ke esibonakala khona kudlalade lakhe.

CL: Selake lathola isicoco na lokhu laqala ukuhlabela?

MD: Isicoco sihlala sisezandleni zethu ngoba kusukisela sisungula leliqembu ngo 2013 kuze kube namhlanje isicoco sikithi njalo sisebenza gadalala ukuze sivikele isicoco sethu ekuthathweni ngamanye amaqembu acula ezomdabu.

CL: Njengoba umnyaka lo suphela likhangelele ukwenzani njengeqembu eminyakeni ozayo.

MD: Thina njengoba usitsho ukuba umnyaka suphelile khathesi sikhangelele ukuthi eminyakeni ozayo sikhiphe idlalade ukuze abantu benelise ukusilalela sibenzela uluju lwendlebe noma bezihambela ngezimota zabo ngoba bazabe belalele idlalade. Okunye njalo sifisa ukuqhelisa iqembu lethu libe ngamaqembu amabili asebenza ndawonye.

Isifiso sethu njalo yikuthi ngabe siyathola abangasinceda ngemali ukuze senelise ukukhipha idlalade laethu.

CL: Nkuthazo bani oyipha abaculi abasakhasa?

MD: Kubaculi abasacathula ngithi kababambelele emculweni njalo bazimisele babuye bahloniphe abantu. Ekuculeni kwabo kubalulekile ukuthi bengaculi bedakiwe ukuze bengaphethi bethethisa abantu. Abalesifiso sokuhlabelela ngiyabakhuthaza ukuthi bahlangane lathi sifundisane ukuze sithi mhla sibatshiye belolwazi lokuqhuba ingoma zomdabuko.

Okunye njalo ngibakhuthaza ukuthi bengasoneli umsebenzi wethu ngoba ukuhlabela lokhu yiwo umsebenzi wethu ngakho abalandeli balo umculo kufanele baphathwe kahle bahlonitshwe.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds