uMthunywa
Nomthandazo Ndlovu
BABAMBE oluphuphumayo abazalwane benye isonto yesiPostoli esigabeni seSilalatshani eFilabusi ngemva kokuba umfundisi walisonto etholakale ezincindela uluju lwemvelo ngemva kwesiphala lomunye wezimvu zakhe.
Isibheyabheya sendaba lesi senzakale ngoMgqibelo ebusuku lapho uMnumzana Tariro Moyo ongumfundisi walelibandla otholakale encinda uluju lwemvelo loNkosazana Senzeni Nkala ongumzalwane ngemva kwesiphala somuzi obekulomlindelo khona.
Ekhuluma loMthunywa uMnumzana Brilliant Mlotshwa ongumzalwane walelibandla uthe lihlazo elenziwe ngumfundisi wabo.
“Thina sikhangelele ukuthi umfundisi kube ngumuntu oyisibonelo kubazalwane, manje nxa umfundisi njalo engumuntu othetheyo seyatholakala esenza into enje lomzalwane asisakwazi ukuthi senzenjani.
“Mina ukubabona angibabonanga besenza into yabo le, ngezwa ngabantu sebekhuluma ukuthi babanjiwe, kuthiwa batholwa ngomunye laye owayesiyachitha amanzi wasebiza abanye ababakhanyisa ngesibane, yikho ukuthi babone ukuthi ngobani,” kutsho uMnu Mlotshwa.
Omunye umzalwane ongathandanga ukubethwa ngegama owayekhona laba ababili bebanjwa uthe into ayibona lapho yamangalisa ngoba uMaNkala ngumuntu othethweyo ongakhangelelwanga ukwenza njalo.
“Mina ngaphuma enkonzweni ngisiyachitha amanzi, ngithe nje ngifika duze lesiphala ngezwa umsindo wabantu ngalunguza ngoba kwakulenyanga, umuntu engamnanzelelayo ngumfundisi kuphela.
Kwangimangalisa lokho ngahle ngagijima ngisiyabiza abanye ukuthi bazengibonisa umhlola lo.
“Saphenduka sesilesibane sengilabanye, sithe sikhanyisa sabona hawu nguMaNkala lomfundisi, bethuka baswela lokuthi benzeni ngoba bonke ngabantu abatshadileyo, kodwa uMoyo umkakhe wayengabuyanga emlindelweni esele koBulawayo lapha abahlala khona,” kutsho umfakazi lo.
UMthunywa uzwe ukuthi inkonzo yama ntsi kwaba yisisanasana sodwa umkaMaNkala esefuna ukudla umfundisi ephila.
Ebuzwa ngodaba lolu uMaNkala uthe wavumela uSathane emhlala entanyeni nje seze wamchithela umtshado wakhe.
“Angazi ukuthi ngangenwa yini lami, ngilenhloni ngilapha, umfundisi ubesengithwalise nzima esithi uyangifuna ngaze ngacina sengiswela ukuthi lami ngithini.
“Ngiyazisola khathesi umkami sengixotshile emzini wethu ngenxa yento yokungazibambi, engikukhulekelayo yikuthi angixolele ngoba wonke umuntu uyaphambanisa,” kutsho uMaNkala.
UMnumzana Mpumelelo Nyathi umkaMaNkala uthe nxa ekhuluma ngodaba lolu uzwa ubuhlungu ngoba sechithekelwe ngumuzi ngenxa kamfundisi ogangileyo.
“Ngizwa ubuhlungu ngento le, bengingakhangelelanga ukuthi uMoyo enze njalo ngoba ngomunye wabafundisi abakhulu ebandleni njalo uthethe,” kuphetha uMnu Nyathi.
Imizamo yokukhulumisana lomfundisi yehlule ngoba ucingo lwakhe lwalile ukungena.
