uMthunywa
WETHUSE abanengi umfundisi webandla labasindisiwe evuma emsakazweni Ukhozi FM ukuthi unoxhaxha lwezintombi phakathi ebandleni. Ulamakhosikazi amabili futhi kulezi zintombi ezikhona, uhlela ukukhetha ezintathu azatshada lazo ngoMfumfu lonyaka.
Lumfundisi odume ngelokuthi King Prophet Sazi Ndwandwe webandla iHealing Hour Emmanuel Global Ministries, ingxoxo yakhe lomsakazi walo msakazo, uNomfundo Mkhize, isisabalele ezinkundleni zokuxhumana kanti abantu abawuvali umlomo, ngitsho abangabazalwane balelibandla.
Leli bandla lilamagatsha amanengi eKwaZulu-Natal okubalwa kuwo eleNongoma, eThekwini, Mtubatuba, oLundi, Ophongolo laseMnambithi.
Ekhuluma lephephandaba leSolezwe ngoMgqibelo, uNdwandwe uzwakale emangala ngabalenkinga ngendlela aziphatha ngayo. Uthi akuyona imfihlo ukuthi ulenqwaba yezintombi ebandleni, langaphandle kwasebandleni uthi ulazo.
“Mina uma ngibone intombi ngayithanda, ngiyayitshela bese kuya ngokuthi siphathana kanjani layo.
“Uma sengibona sesithandana ukuthi ayiziphathanga kuhle, siyehlukana.
“Ngilazo zona izintombi futhi ngilungiselela ukuthatha ezintathu, zibe ngamakhosikazi ami ungakashayi u-Okthoba lonyaka.”
Uthe kulezi zintombi zikhona ezisagcwele mpu lezinye ezingasaphelelanga. “Abangakathintwa, lami angibenzi lutho.
“Ngibagcinela umtshado kanti asebethintiwe, lami ngiyaqhubeka lokubathinta ngoba sebeyayazi indoda. Uma ngibagcina bazoqhubeka lokuthintwa ngabanye abafana ngasese.”
Echaza ukuthi kungani elesithembu futhi ehlobonga labanye abantu besifazane ekubeni engumfundisi osindisiwe, uNdwandwe uthe yena kafuni ukuphila impilo yamanga njengabanye abafundisi.
“Mina ngiyindoda yomZulu. Abanye bakholelwa ukuthi uNkulunkulu ukupha umfazi, mina ngileso lokubona umfazi wami.
“Izishimane ezithi ziyaboniswa yizo lezi ezijola emakhoneni, zilalane bese kukhitshwa lezisu. Mina ngiyinsizwa yomZulu esakhuzela uma ibona intombi eyithandayo.”
Uthe lasemandulo kulamadoda kaNkulunkulu ayelenqwaba yezancinza.
“Mina angiholwa yizwi kodwa ngilandela umgomo wakwaNdwandwe. Mina nganikezwa izwe kwathiwa angibuse kulo.”
UNdwandwe uthe inengi labazalwane liyamjabulela ngoba wenza umehluko ezimpilweni zabo.
Kodwa ngesikhathi leli phephandaba likhuluma lamanye amalunga alelibandla, atsho okwehlukile.
“Abanye bethu abaneme neze ngoba sikhonza namadodakazi ethu.
Njengoba silibandla labasindisiweyo nje, akuzwakali kahle ukuthi umfundisi wethu ulesithembu futhi aphinde abe loxhaxha lwezintombi.”
Ukuthola ukuphawula kwamakhosikazi kaNdwandwe kugcine kungaphumelelanga.-Isolezwe
