uMthunywa
Ncekwenhle Ncube
NGENXA yobugovu kulenye indoda yeMlomoliwodo eGwanda ekhahlele unkosikazi wayo wephuka imbambo kubangwa ukuthi kungani engamtshiyelanga amakhomane.
Lindabamlonyeni yenzakale ngoLwesithathu kuviki edluleyo lapho uCharles Ngwenya axabane khona lonkosikazi wakhe okutholakale ukuthi nguNakaMaNgwe nje kuphela ngemva kokuthatha amakhomane akhe wawapha uninazala obebavakatshele.
Kubikwa yawuchitha umuthi inkonyane ngemva kokuba uNakaMaNgwe ekhiphe isikhuni eziko watshaya ngaso umkakhe ethi ukhulumela izimbiza njengomfazi.
Ngokucwayiza kwelihlo uNgwenya wathi lothu waqala ukutshaya umkakhe ngenqindi ngapha emkhahlela waze wephuka imbambo.
Intatheli ibikelwe ukuthi uNakaMaNgwe wathatha amakhomane ayesele ngoLwesibili ntambama wapha uninazala ethi umzwisa izithelo zakuqala.
Isenzo lesi kasimphathanga umyeni wakhe ngoba engazange awadle lawo makhomane yena kunguye owayebuye lawo.
Omunye umfakazi ongathandanga ukubethwa igama uchaze ukuthi uNgwenya wacatshulwa yikuthi kudliwe izithelo zakuqala ziphele yena engazitholanga yena eyinhloko yomuzi.
“UNgwenya wathi yena okumzondisileyo yikuthi kahlonitshwanga njengenhloko yomuzi. Wathi isintu asikuvumeli ukuthi into enjalo yenzakale.
“Sathi sifika samthola ekhahlela unkosikazi wakhe kabuhlungu ethi yena kadelelwa ngumfazi amlobolayo. Kwaze kwanceda amanye amajaha ayezidlulela amlamula ngoba bethi uzabulala umuntu,” kulandisa umfakazi lo.
Kufikile endlebeni zikaMthunywa ukuthi ababili laba ngemva kokukhumisana umlotha babuya baqhubana besiya esibhedlela ukuyakwelaphisa uNakaMaNgwe.
Esinye isakhamuzi esikhulume loMthunywa uNkosikazi Eunice Ndlovu uthe lokhu abakwenzileyo kulihlazo esigabeni sakibo.
“Iqiniso yikuthi isenzo lesi sibi endaweni yakithi. Kuyayangisa ukuzwa kuthiwa abantu abadala balwile bebanga amakhomane. Abantu abake bazihloniphe.
UMnumzana Elliot Ncube ongusobhuku kule indawo uthe udaba olunjalo kalukafiki kuye kodwa ukhuthaza abantu ukuthi bahlale ngokuthula emizini yabo.
“Bengingakalwamukeli udaba olunjalo kodwa abantu kumele behlukane lomkhuba wokulwela ukudla,” kuphetha usobhuku uNcube.
